ސަރުކާރުގެ ބޭނުމަށް ނުއަގުގައި ފަޅުތަކާއި ރަށްތައް ދޫކުރާއިރު ކައުންސިލްތަކާ އެއްވެސް ވަރަކަށް މަޝްވަރާ ނުކުރާކަން ހާމަވެއްޖެއެވެ.

ފަތުރުވެރިކަމާ ބެހޭ ވުޒާރާއިން ކޮށްފައިވާ އިއުލާންގައި ބުނެފައިވަނީ ގަވާއިދު ނަންބަރު: 2016/R- ގެ ދަށުން، ދޫކުރުމަށް ކަނޑައަޅާފައިވާ ރަށްރަށާއި ފަޅުތަކުގެ ތެރެއިން އިޢުލާނުގައި ހިމަނާފައިވާ ލިސްޓުގައިވާ ރަށްރަށާއި ފަޅުތަކުގައި ފަތުރުވެރިކަން ތަރައްޤީކުރުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ހުޅުވާލެވިފައިވާކަމަށެވެ.

ފަޅުތަކާއި ރަށްރަށުގެ ލިސްޓް އެ ވުޒާރާއިން ހާމަކޮށްފައިވާއިރު ބައެއް ކައުންސިލްތަކުގެ ވެރިން އަންނަނީ އެ ލިސްޓް ސޯޝަލް މީޑިޔާގައި ހިއްސާކުރެއްވުމަށްފަހު ސަރުކާރަށް ފާޑުކިޔަމުންނެވެ.

އެގޮތުން ވާވު އަތޮޅުގެ ކައުންސިލްގެ ރައީސް ޝުޖާއު އަލީ ވަނީ އޭނާގެ އެކްސް ހޭންޑަލްގައި ޕޯސްޓެއް ކުރައްވާ، ރަށްރަށާއި ފަޅުތައް ދައުލަތުގެ ބޭނުމަށް ކުއްޔަށް ދޭއިރު ކައުންސިލްތަކާ އެެއްވެސް ވަރަކަށް މަޝްވަރާކޮށްފައިނުވާކަމަށް ބުނެފައެވެ.

އަތޮޅު ކައުންސިލްތަކާއި އެއްްވެސް ވަރަކަށް މަޝްވަރާ ކުރުމެއްނެތި ފަޅުތަކާއި ރަށްތައް ދޫކުރުން ޝުޖާއު ވަނީ ކުށްވެރިކޮށްފައެވެ.

ސަރުކާރުން ގެންގުޅޭ މިފަދަ ސިޔާސަތުތައް ގިނަ ބަޔަކަށް ގަބޫލު ނުކުރެވެނީ މީގެ ކުރިން ފަޅުތަކާއި ރަށްތައް ކުއްޔަށް ދިނުމުގައި ކައުންސިލްތަކާއި މަޝްވަރާ ކުރެވިފައި ހުރީމާ ކަން ފާހަގަކޮށްލެވެއެވެ.

ފަތުރުވެރިކަމާ ބެހޭ ވުޒާރާއިން މިފަދަ ކަންކަން ނިންމާފައިވާއިރު އެ ވުޒާރާގައި ހުންނެވީ މި ސަރުކާރުގެ އެންމެ ނާގާބިލް ވަޒީރެވެ.