އިޒްރޭލުގެ ޕާސްޕޯޓް މަނާ ކުރަން ނުކެރިގެން އުޅެނީ ލިބޭ ޑޮލަރު ކޮޅު މަދުވެދާނެތީކަމަށް ވިދާޅުވެ ކުރީގެ ހޯމް މިނިސްޓަރު އުމަރު ނަޞީރު ސަރުކާރަށް ފާޑުކިޔުން އަމާޒުކޮށްފިއެވެ.

ހުކުރު ދުވަހު އާޓިފިޝިއަލް ބީޗް ސަރަހައްދުގައި އިސްރާ އެސޯސިއޭޝަނުން އިސްނަގައިގެން ބޭއްވި އެއްވުމެއްގައި ވާހަކަދައްކަވަމުން އުމަރު އިތުރަށް ވިދާޅުވީ ފަލަސްތީނުގެ މުސްލިމް އަޚުންނާއި އުޚްތުން ކުޑަކުދިން ހިމެނޭހެން މަރަމުންދާއިރު އަރަބި ބޮޑެތި ގައުމުތަކުން އެއްވެސް ވަރަކަށް އަޅާނުލާކަމަށެވެ.

އަދި އިޒްރޭލުން ފަލަސްތީނަށް ދެމުންދާ އަނިޔާތައް އުމަރު ވަނީ ހަރުކަށިކޮށް ކުށްވެރިކޮށްފައެވެ.

މީގެ އިތުރުން، ބޮޑެތި އަސްކަރިއްޔާތައް ތަރއްގީކޮށްގެން ތިބި ނަމަވެސް، ފަލަސްތީނަށް އެހީތެރިކަމެއް ނުދެވޭނަމަ މިސްރުފަދަ ގައުމުތަކުގެ ބޭނުމެއް އެބަ އޮތްތޯވެސް އުމަރު ވަނީ ސުވާލު އުފައްދަވާފައެވެ.

ދިވެހިރާއްޖެއިންވެސް އިޒްރޭލުގެ ޕާސްޕޯޓް މަނާކުރެވެން ޖެހޭނެ ކަމަށާއި، އެކަން ނުކޮށްގެން އުޅެނީ އެމެރިކާއަށް ބިރުން އަދި ޑޮލަރު މަދުވެދާނެތީ ކަމަށް އުމަރު ފާހަގަކޮށްފައިވެއެވެ.

މިފަދަ ފިޔަވަޅުތައް އަޅަން ނުކެރެންޏާ ކޮމަންވެލްތް އިންވެސް ރާއްޖެ ވަކިވުމަށް އުމަރުވަނީ ގޮވާލައްވާފައެވެ. މުސްލިމް އެތައް ބަޔަކު ބަނޑަށް ޖައްސާ މަރަމުންދާއިރު، އެ ލާއިންސާނީ އަމަލުތައް ހިންގާ ފަރާތްތަކަށް ވާގިވެރިވާ ވިޔަފާރިތައް ހިންގާ އެ ފައިސާ ބޭނުންކޮށްގެން ނުވާނެ ކަމަށްވެސް އުމަރު ގޮވާލެއްވިއެވެ.

މި އެއްވުމުގައި ބައިވެރިވި ފަރާތްތައް އިޒްރޭލުގެ ޕާސްޕޯޓް މަނާކުރަން ގޮވާލާފައިވާއިރު، ރައްޔިތުންގެ މަޖިލީހަށް އިއްޔެ ވަނީ މެމްބަރު މީކާއިލް ނަސީމް މި ކަމާއި ގުޅިގެން ގާނޫނެއް އިސްލާހް ކުރަންވެސް ހުށަހަޅާފައެވެ.