"ފަލަސްތީނާއެކު ދިވެހިން" ގެ ނަމުގައި ހިނގާލުމެއް މުޅި ރައްޖޭގައި ބޭއްވުމަށް ވަޒީރުންގެ މަޖިލީހުން މިއަދު ފާސްކޮށްފިއެވެ.

މި ހިނގާލުމާ ގުޅޭގޮތުން ވާހަކަދެއްކެވީ މިއަދު ކުރިޔަށް ދިޔަ ވަޒީރުންގެ މަޖިލީހުގައި ނިންމި ނިންމުންތަކުގެ މައުލޫމާތު ދިނުމަށް ރައީސް އޮފީހުގައި ބޭއްވި ކުރު ނޫސްވެރިންގެ ބައްދަލުވުގައި ހޯމް މިނިސްޓަރު، އަލީ އިހުސާން އެވެ.

އެގޮތުން މިނިސްޓާރ އިހުސާން ވިދާޅުވީ މިއަދު ވަޒީރުންގެ މަޖިލީހުގައި މަޝްވަރާ ކުރެވުނީ ފަލަސްތީނާ ގުޅުންހުރި ކަންތައްތަކުގައި ރާއްޖެއިން ކުރިއަށް އޮތް ތަނުގައި އަމަލު ކުރަން ފެންނަ ގޮތްތަކާ ބެހޭ ގޮތުން ކަމަށެވެ.

މަޝްވަރާ ކުރެވުނު ކަންތައްތަކުގެ ތެރޭގައި އިޒްރޭލު ޕާސްޕޯޓުގައި އެއްވެސް މީހަކަށް ރާއްޖެ އެތެރެ ނުވެވޭ ގޮތް ހެދުމަށްޓަކައި ގާނޫނަށް ގެންނަންޖެހޭ ބަދަލުތައް ގެނައުމާއި ފަލަސްތީނުގެ ރައްޔިތުން ދިވެހިންގެ ފަރާތުން ބޭނުންވަނީ ކޮންކަމެއްތޯ ބެލުމަށް މަޝްވަރާ ކުރި ކަމަށް ވެސް މިނިސްޓާރ އިހުސާން ވިދާޅުވި އެެވެ.

ފަލަސްތީނުގެ ރައްޔިތުންނަށް އެހީ ފޯރުކޮށްދިނުމަށް ފަންޑު ރެއިޒް ކުރުމާއި ރާއްޖެއިން އިސްނަގައިގެން ފަލަސްތީނު މައްސަލައަށް ހައްލެއް ހޯދުމަށް އިސްލާމީ ގައުމުތަކާއެކު މަޝްވަރާ ކުރުމަށް ވެސް ނިންމާފައިވާކަމަށާއި އޭގެއިތުރުން ފަލަސްތީނާއެކު ދިވެހިން މިނަމުގައި މުޅި ރާއްޖޭގައި ހިނގާލުމެއް ބާއްވަން ވެސް ވަނީ ނިންމާފަ ކަމަށް މިނިސްޓާރ އިހުސާން އެ ނޫސްވެރިންގެ ބައްދަލުވުމުގައި ވަނީ ފާހަގަކުރައްވާފައެވެ.

ވަޒީރުންގެ މަޖިލީހުން ހިނގާލުމެއް ކުރިޔަށް ގެންދަން ނިންމާފައި ވާއިރު އާންމު ފަރާތްތަކައި ޖަމިއްޔާ ޖަމާއަތްތަކުން އަންނަނީ އިސްނަގައިގެން ފަލަސްތީނު ރައްޔިތުންގެ ހައްގުގައި އަޑުއުފުލުމަށް ހިނގާލުންތައް މާލެގަޔާއި ރާއްޖޭގެ އެކި ހިސާބުތަކުގައި ކުރިޔަށް ގެންދަމުންނެވެ.