އިޒްރޭލުގެ ޕާސްޕޯޓް ބޭނުންކޮށްގެން ދިވެހިރާއްޖެ އަށް އެތެރެވުން މަނާކުރަން ދިވެހި ސަރުކާރުން އިއްޔެ ނިންމުމާ ގުޅިގެން، ރާއްޖޭގައި ތިބި އެ ގައުމުގެ މީހުން ވަގުތުން ފޭބުމަށް އިޒްރޭލުގެ ފޮރިން މިނިސްޓްރީން އަންގައިފި އެވެ.

ދިވެހިރާއްޖޭގެ މި ނިންމެވުމާއި އެކު ރާއްޖޭގައި ތިބި އިޒްރޭލުގެ މީހުން ވަގުތުން ފޭބުމަށްއެ ގައުުމުގެ ސަރުކާރުން ވަނީ އިލްތިމާސްކޮށްފައެވެ. މީގެ އިތުރުން، ދިވެހިރާއްޖެއަށް ދަތުރު ނުކުރުމަށްވެސް އެ ގައުމުގެ ރައްޔިތުންނަށް ވަނީ އަންގާފައެވެ.

އިޒްރޭލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ ލާއިންސާނީ އަމަލުތަކާއި ދެކޮޅުކަން ހާމަކުރުމަށް ސަރުކާރުން މިފަދަ ނިންމުމެއް ނަގާފައިވަނީ، ދިވެހިން އިޒްރޭލް ޕާސްޕޯޓް މަނާކުރަން ގޮވާލަމުންދާތާ އެތައް ދުވަހެއް ފަހުން ކަން ފާހަގަކުރެވިފައިވެއެވެ. އިޒްރޭލު ޕާސްޕޯޓް މަނާކުރުމަށް ގިވާލާ ދިވެހި ރައްޔިތުން ވަނީ ރައީސް އޮފީސް ކުރިމަތީގައި އިއްޔެ މުޒާހަރާވެސް ކޮށްފައެވެ. އަދި ސަރުކާރުން ނިންމެވި ނިންމުމަކީ ސަރުކާރަށް ޕްރެޝަރ ބޮޑުވެގެން އިތުރު ގޮތެއް ނެތިގެން ނެގި ފިޔަވަޅެއް ކަަމަށްވެސް ގަބޫލުކުރެވެއެވެ.

ރާއްޖެ އަށް މިދިޔަ އަހަރު އިޒްރޭލުން އައިސްފައި ވަނީ ގާތްގަނޑަކަށް 11،000 ޓޫރިސްޓުންނެވެ. އެކަމަކު، އެއީ އޭގެ ކުރީ އަހަރަށް ވުރެ 30 ޕަސެންޓު ދަށް އަދަދެކެވެ. މިދިޔަ އަހަރުގެ ޑިސެމްބަރު މަހުން ފެށިގެން މި އަހަރުގެ އޭޕްރީލް މަހާ ހަމައަށް އިޒްރޭލުން އައީ 528 ޓޫރިސްޓުންނެވެ.