ކުރީ ސަރުކާރުތަކުން ތައާރަފްކުރި ލޯންތައް މި ސަރުކާރުން ހުއްޓުވައިފިކަން ހާމަވެއްޖެއެވެ.

ތޭރަ އޮންލައިނަށް މައުލޫމާތު ލިބިފައިވާ ގޮތުގައި ހުއްޓުވާފައިވަނީ، އެސްއެމްއީ ޑިވެލޮޕްމަންޓް ފައިނޭންސިން ކޯޕަރޭޝަން (އެސްޑީއެފްސީ) އިން ތައާރަފްކޮށްފައި ހުރި ލޯންތަކެވެ.

އެގޮތުން އެސްޑީއެފުން ވަނީ ބައެއް ފަރާތްތަކުން ލޯނަށް އެދި އެޕްލައިކުރުމުން އެ ލޯނު ހުއްޓާލާފައިވަކަމަށް ބުނެފައެވެ. އެގޮތުން ދާދި ފަހުން ރަށު ފަތުރުވެރި ލޯނަށް އެދުނު ފަރާތަކަށް ވެސް އެސްޑީއެފުން ކުރި މެސެޖެއްގައިވަނީ އެ ލޯން ވަނީ ހޯލްޑްކޮށްފައިކަމަށާ ދޫކުރަން ފަށާނެ ތާރީޚެއް ބުނަން ނޭނގޭ ކަމަށެވެ. ނަމަވެސް ވީހާ ވެސް އަވަހަކަށް ފަށަން މަސައްކަތްކުރަމުން ދާކަމަށްވެސް ބުނެފައިވެއެވެ.

މައުލޫމާތު ލިބިފައިވާ ގޮތުގައި އެސްޑީއެފުން ވަނީ ރައީސް އިބްރާހިމު މުހައްމަދު ސޯލިހުގެ ސަރުކާރާ އަދި އޭގެ ކުރިން ރައީސް އަބްދުﷲ ޔާމީންގެ ސަރުކަރުންވެސް ތައާރަފްކޮށްފައިވާ ލޯނުތައް ހުއްޓުވާފައެވެ. ބަދަލުގައި މި ސަރުކާރުން ތައާރަފްކޮށްފައިވަނީ އެންމެ ދެ ލޯން ސްކީމު ކަމަށާ އެއީ އަންހެނުންނަށް ފަށާ ވިޔަފާރިވެރިކަމުގެ ލޯނާ ފަރުމަސްވެރިކަމުގެ ލޯނެވެ. ނަމަވެސް މި ލޯނުތައް ވެސް ލިބުނު ފަރާތެއް ނެތެވެ.