މި ސަރުކާރުގެ އެޑިއުކޭޝަން މިނިސްޓަރު ދެކި ވަޑައިގަންނަވާ ގޮތުގައި ކުދިން ބުލީ ކުރަނީ ކްލާސް ރޫމުތައް އެއަރ ކޮންޑިޝަން ނުކޮށް ހުންނާތީ ކަމަށް ކަން ހާމަވެއްޖެއެވެ.

ކްލާސްތަކުގައި އެއާ-ކޮންޑިޝަން ހަރުކޮށް ފިނި ވާން ފެށުމުން ދަރިވަރުން އެއް ކުއްޖަަކު އަނެއް ކުއްޖަކަށް ބުލީ / ގަނާ ކުރުމުން ދުރުހެލިވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލު ޝަފީއު ވަނީ ވިދާޅުވެފައެވެ.

ޑރ. ޝަފީއު މިފަދައިން ވިދާޅުވެފައިވަނީ ރާއްޖޭގެ ހުރިހާ ސުކޫލުތައް އޭސީ ކުރުމަށް ސަރުކާރުގެ "ކޫލް ސްކޫލް" މަޝްރޫޢު ފެށުމަށް ކ. މާފުށީ ސުކޫލުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގެ ތެރޭގައެވެ.

މިނިސްޓަރު ވިދާޅުވީ "ކޫލް ސްކޫލް" ތަކަކީ ދަރިވަރުންގެ ހިތްތަކަށް ފިނިކަމާއި އުފާވެރިކަން ގެނުވާނެ ތަންތަން ކަމަށެވެ. އަދި ސުކޫލުތައް ފިނި ކުރެވުމުން ދަރިވަރުންގެ ކިޔެވުމާއި އުޅުމަށް ރަނގަޅު ބަދަލުތަކެއް އަންނާނެ ކަމަށެވެ. އަދި މިކަމުގެ ސަބަބުން ދަރިވަރުން، ބުލީ ކުރުން ފަދަ ވިޔާނުދާ ކަންކަމާ ދުރުހެލިވާނެކަމުގައި ވެސް މިނިސްޓަރު ވިދާޅުވިއެވެ.

ޝަފީއު ވިދާޅުވީ މި މަޝްރޫއަށް ބޮޑު ހޭދައެއް ސަރުކާރުން ކުރަންޖެހުނު ނަމަވެސް ތައުލީމަށް ކުރާ ހަރަދަކީ މުސްތަގުބަލަށް ކުރެވޭ އިންވެސްޓުމެންޓެއް ކަމަށެވެ. އަދި ސަރުކާރުން ތައުލީމުގެ ފެންވަރު ރަނގަޅުކުރަން ކުރަންޖެހޭ ހަރަދުތައް ކުރުމަށް ފަސްނުޖެހޭނެކަމަށެވެ.