ރަދުންނާއި ރަނިންގެ ރަސްކަމަށް ނިމުމެއް އައީ ދިވެހި ރާއްޖެއަށް ޑިމޮކްރަސީ ތައާރަފްވުމުންނެވެ. ޑިމޮކްރަސީ ތައާރަފްވުމުން ސިޔާސީ ޕާޓީތައް އުފެދެން ފެށިއެވެ. ދެން ފެނިގެން ދިޔައީ މި ދެންނެވި ސިޔާސީ ޕާޓިތަކުގެ ސަބަބުން އާއިލާތައް ރޫޅި، ރަހުމެއްތެރިކަން ގެއްލިގެން ދިޔަ މަންޒަރެވެ.

ޑިމޮކްރަސީގެ ނިޒާމުން އައި ވެރިކަމެއް ވައްޓާލުމަށް ރާއްޖޭގައި ބަޣާވާތް ކުރާ މަންޒަރު ދުނިޔޭގެ މީޑިއާ ތަކުގައިވެސް އާންމުވިއެވެ. ވަކި ޕާޓީއަކަށް ތާއިދުކުރާ ޓީވީ ސްޓޭޝަންތަކުގައި ހުޅުޖަހާ، މަގުތައް މަތީ މުޒާހަރާކޮށް މީހުންނަށް ފުރައްސާރަ ކުރަން ފެށިއެވެ.

މުއްސަނދި ޕާޓީތަކާއި ސިޔާސީ މައިދާނުގައި އިސްވެ ހަރަކާތްތެރިވަމުން އަންނަ މީހުންގެ ޖީބަށް އެޅޭ ފައިސާ އިތުރުވެ އާންމު ރައްޔިތުން ދެފުށް ނުޖެހޭވަރަށް ނިކަމެތިވިއެވެ.

ކަން މިހެން ދިމާވާން ފެށުމުން ރައްޔިތުން ޑިމޮކްރަސީ މަތިން ފޫހިވާން ފެށިއެވެ. ދިވެހި ރާއްޖޭގެ ސިޔާސީ ޚަބަރަކީ ރައްޔިތުން އަަޑުއަހަން ބޭނުންނުވާ ޚަބަރުތަކަކަށް ވެގެން ދިޔައީ އިސާހިތަކުއެވެ.

ޕާޓީއެއް ނުވަތަ ސިޔާސީ ބޮޑެއްގެ ވާހަކަ ދެއްކުމުން ރައްޔިތުންގެ މޫނުމަތިން ފެންނަނީ ފޫހިކަމެވެ.

ވާނީވެސް އެހެންތާއެވެ. ރައްޔިތުން އިތުބާރުކޮށް ވެރިކަމަށް އަރުވާ ވެރިން ހަމަ އެ ރައްޔިތުންނަށް ވީ ވައުދުތަކާ ޚިލާފަށް ކޮރަޕްޝަންގެ އަމަލުތައް ހިންގުމުން ރައްޔިތުންނަށް ކަމަކުނުދާނެނޫންތޯ؟

ވެރިކަމަށް އައުމަށް ފަހު މިފަދަ މަންޒަރު ފެނުމުން ވެރިންގެ ހިތްތަކަށް ކެތް ނުވުމުން ޒުވާނުން ސިޔާސީ ދާއިރާއަށް ނެރުމުގެ މަސައްކަތް ފަށައެވެ. ނަމަވެސް މި މަސައްކަތުންވެސް ސިޔާސީ ދާއިރާއިން ފެނިގެން ދަނީ މަދު ޒުވާނެކެވެ.

ނިމިދިޔަ ވެރިކަމުން ފެނިގެން ދިޔައީ ވޯޓު ހޯދުމަށް ބޮޑު ކުންފުންޏެއް ލޫޓުވާލި މަންޒަރެވެ. ކުންފުންޏަށް ނުވާ ވަރުން ވޯޓަށް ވަޒީފާ ވިއްކަމުން ދިޔައެވެ. ނަމަވެސް މިއަދު އެ އަވައިގައި ޖެހުނު ރައްޔިތުން އެ ތިބީ ވަޒީފާއެއް ނެތުމުން ބިކަ ވެފައިއެވެ.

މިފަދައިން ކަންތައްތައް ހިނގާނަމަ ރައްޔިތުން މިދަންނަވާ ޑިމޮކްރަސީ މަތިން ފޫހި ނުވާންވީ ސަބަބެއް ހޯދާ ފެންނާނެތޯ؟

ކޮންމެއަކަސް މިހުރިހާ ކަމެއް މިފަދައިން ވެ ނިމިއްޖެއެވެ.

ނަމަވެސް މި ހުރިހާ ކަމެއްގެ ނަތީޖާ ފެނުމުން އެއްކަލަ ސިޔާސީ އިސްވެރިންނަށް ކެތް ނުވާނެކަން ޔަގީނެވެ. ނިމިދިޔަ ރިޔާސީ އިންތިޚާބުގައި ޒުވާނުންނާއި ހަރު އުމުރުގެ މީހުންވެސް ދިޔައީ އަޑު ހަރުކޮށް އަހަރެންނެއް ވޯޓެއް ނުލާނަމޭ ބުނަމުންނެވެ.

ވޯޓު ނުލާންވީ ކީއްވެތޯ ސުވާލުކުރުމުން އެ މީހުންގެ ރައްދަކަށް ވަނީ "ވޯޓު ލައިގެން ވަކި ކަމެއް ތަފާތުވޭތަ؟" އެވެ.

ދެން ފެނިގެން ދިޔައީ ނިމިދިޔަ މާލޭގެ މޭޔަރުކަމުގެ ބައި އިލެކްޝަނަށް ވޯޓުލާން ޝަރުތުހަމަވާ މީހުންގެތެރެއިން އެންމެ 31.84 އިންސައްތަ މީހުން ވޯޓު ލި މަންޒަރެވެ. ރާއްޖޭގެ ރައްޔިތުން ސިޔާސީ ކަންތައްތައް މަތިން ފޫހިވެފައިވާކަން އެ އަދަދުން ހާމަވޭނޫންތޯއެވެ؟

ސުވާލު އުފެދެނީ ރައްޔިތުންގެ ޑިމޮކްރަސީއަށް ގެއްލިފައިވާ އިތުބާރު އަނބުރާ ހޯދާނެ ގޮތަކާއި މެދުއެވެ.

މި އިތުބާރާއި ޝައުގު ނެތް ނަމަ މި ގައުމުގެ ހާލަތު ދާނީ ދުވަހަކަށް ވުރެ ދުވަހެއް ދަށަށްކަން އެއީ ޝައްކެއްނެތްކަމެއްކަން ޔަގީނެވެ.