މޯލްޑިވްސް ޕޯސްޓްގައި މަސައްކަތް ކުރާ މުވައްޒަފުން، މަސައްކަތް ފެށުމުގެ ކުރިން ފޯނުތައް ލޮކަރަށް ލާން މަޖުބޫރުކުރާކަން ހާމަވެެއްޖެއެވެ.
"ތޭރަ އޮންލައިން" އަށް މައުލޫމާތު ދެމުން ޕޯސްޓްގައި މަސައްކަތް ކުރަމުންގެންދާ މުވައްޒަފެއް ނަން ހާމަނުކުރުމަށް ޝަރުތުކޮށް ބުނީ ކޮންމެ ދުވަހަކުވެސް މަސައްކަތް ފެށުމުގެ ކުރިން އެ މުވައްޒަފެއްގެ ފޯނު ލޮކަރަށް ލުމަށް އަންގާފައިވާކަމަށެވެ.
މިކަން ކުރަން އޯޑަރު ދިނީ އެ ކުންފުނީގެ އެމްޑީ ޝަފީގު އާއި، ކުންފުނީގެ އެގްޒެކެޓިވް ޑިރެކްޓާރ ސީމާ އަދި ކުންފުނީގެ އެސިސްޓަންޓް މެނޭޖިންގ ޑިރެކްޓާރ ޝަރުމާ ކަމަށް ވެސް އެ މުވައްޒަފު ވަނީ ބުނެފައެވެ.
ފޯނު ލޮކަރަށް ލާން މަޖުބޫރުކުރުމުން ވަރަށް ބައިވަރު ކަންކަން ދިމާވާކަމަށާއި އޭގެ ސަބަބުން ފެމިލީ އެމަޖެންސީ އެއް ދިމާވުމުން ވެސް ނޭނގޭ ކަމަށް ވެސް އެ ފަރާތުން ވަނީ ބުނެފައެވެ.
ކުރިން ދުވަހުވެސް، މިތާ މުވައްޒަފެއްގެ ބައްޕަ ހާލު ދެރަވެގެން އެމަޖަންސީގައި ހޮސްޕިޓަލް އަށް ގެންދިޔަ ވާހަކަ ބުނަން އޭނާގެ އާއިލާ އިން އެތައް ފަހަރެއްގެ މަތިން އޮތް ގުޅާފައި. ފޯނު ލޮކަރަށް ލާން ބުނެފަ އޮތީމަ މަސައްކަތް ފެށުމުގެ ކުރިން އެންމެންވެސް ފޯނުތައް ލަނީ ލޮކަރަށް، ކަމެއް ވެގެން ފޯނަށް މީހަކު ގުޅިޔަސް ނޭނގޭ. ވަރަށް އުނދަގޫވޭ އެގޮތައް ހަދަން މަޖުބޫރު ކުރުވާތީ
ޕޯސްޓްގައި މަސައްކަތް ކުރާ ޒުވާނާ ބުންޏެވެ.
އެ މުވައްޒަފު ވަނީ ފޯނު ލޮކަރަށް ލާން މަޖުބޫރު ކުރާތީ ކަންބޮޑުވުން ފާޅުކޮށްފައެވެ.
މިފަދަ ކަންކަމަކީ ހިއުމަން ރައިޓްސް ކޮމިޝަނުން ވެސް އިސްނަގައިގެން ބަލަން ޖެހޭނެ ކަންކަމެވެ. މިފަދަ ތަރައްގީ ވެފައި އޮތް ޒަމާނެއްގައި މަސައްކަތު މާހައުލުގައި ކުރިމަތި ކުރުވަމުންގެންދާ ފިއްތުންތަކަށް ނިމުމެއް ގެންނަން ޖެހޭ ކަމަށް ވެސް ގިނަ ފަރާތްތަކުން ބުނެއެވެ.
