މޯލްޑިވްސް ސިވިލް އޭވިއޭޝަން އޮތޯރިޓީން އައު ގަވާއިދެއް އެކުލަވާލައި ގެޒެޓުކޮށްފި އެވެ. އެގަވައިދުގައި ޥާގޮތުން އެއަރކްރާފްޓް އެކްސިޑެންޓެއް ހިނގާތާ ދެ ގަޑިއިރު ތެރޭގައި ވެލިޑޭޓްކޮށްފައިވާ ފަސިންޖަރުންގެ ލިސްޓެއް ހުށަހެޅުން ލާޒިމް ކޮށްފައި ވެއެވެ.
މިގަވައިދުގައި އިތުރަށް ހާމަކޮށްފައި ވަނީ ، އެއާލައިންތަކުގައި އުފުލާ ނުރައްކާތެރި މުދަލާއި ބެހޭ މަޢުލޫމާތުވެސް ވަގުތުން ލިބެން ހުންނަންޖެހޭނެ ކަމަށެވެ.
މި ގަވާއިދަށް މި މަހުގެ 12 ވަނަ ދުވަހުން ފެށިގެން ވަނީ އަމަލުކުރަން ފަށާފައެވެ.
މި ގަވާއިދުގެ މައިގަނޑު މަގުޞަދަކީ އޮތޯރިޓީތަކާއި، މެޑިކަލް ޓީމުތަކާއި، އާއިލާތަކާ ގުޅޭ ޔުނިޓްތަކަށް އަވަހަށް އަދި ހަރުދަނާކޮށް ޢަމަލުކުރެވޭނެކަން ޔަގީންކޮށް، ގައުމުގެ ވައިގެ ދަތުރުފަތުރުގެ ރެސްޕޮންސް ނިޒާމު ވަރުގަދަކުރުމެވެ.
މި ގަވާއިދުގެ ދަށުން އެއަރލައިންތަކުން ޓިކެޓް ގަންނައިރު ފަސިންޖަރުންގެ އިމަރޖެންސީ ކޮންޓެކްޓް މަޢުލޫމާތު ވެސް ނަގަންޖެހެއެވެ. މި މަޢުލޫމާތަކީ ހަމައެކަނި އެކްސިޑެންޓެއް ހިނގައިފި ހާލަތެއްގައި ބޭނުންކުރުމަށް ހޯދާ މައުލޫމާތެކެވެ.
މި ގަވާއިދަކީ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން އިން ކަނޑައަޅާފައިވާ ބައިނަލްއަގުވާމީ މިންގަނޑުތަކާ އެއްގޮތްވާ ގަވާއިދެކެވެ.
