ކުރިއަށް އޮތް ރިޔާސީ އިންތިހާބަށް ވޯޓު ދިނުމުގެ ގޮތުން މާރޗު މަހުގެ 7 ވަނަ ދުވަހުގެ ކުރިން އައިޑީކާޑު ހައްދައި ނިންމުމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން އެދިއްޖެއެވެ.

އެބޭފުޅުން މިފަދައިން އެދިފައިވަނީ އިންތިހާބާ ގާތްކޮށް ގިނަ ބަޔަކު އެއްފަހަރާ އައިޑީކާޑު ހައްދަން އުޅުމުން އުނދަގޫތަކާ ކުރިމަތި ލާންޖެހިދާނެތީއެވެ. އެގޮތުން ޑީއެންއާރްއިން ކޮށްފައިވާ އިއުލާނެއްގައި ބުނީ ވޯޓުލާ ދުވަހާ ކައިރިކޮށް ގިނަ ބަޔަކު އައިޑީކާޑު ހެއްދުމަށް ހުށަހަޅައިފިނަމަ ކާޑު ނިންމައި ހަވާލު ކުރުމަށް ދަތިތަކާ ކުރިމަތިވެދާނެތީ ދުރާލައި ކާޑު ހެއްދުމުގެ ކަންތައް ނިންމުމަށް އެދޭ ކަމަށެވެ.

ޑީއެންއާރްއިން ބުނީ ބައެއް ފަރާތްތަކުގެ ކާޑު ހެއްދުމަށްފަހު ނުނަގައި އެބަހުރި ކަމަށާ މި ކާޑުތަކުގެ ވެރިފަރާތް އެބޭފުލެއްގެ ކާޑު ވީ އެންމެ އަވަހަށް ނެގުމަށްވެސް ވަނީ އެދިފައެވެ.

ޑީއެންއާރްއިން ކޮށްފައިވާ އެހެން އިއުލާނެއްގައި ބުނެފައިވަނީ މަޖިލީހުގެ އިންތިޚާބަށް ވޯޓާސް ލިސްޓް ފައިނަލް ކުރުމުގެ ގޮތުން 18 އަހަރުން މަތީ ފަރާތްތަކުގެ މައުލޫމާތު ބަދަލުވެފައިވާނަމަ މި ހިނގާ ޖަނުއަރީ މަހުގެ 21 ވާ އާދީއްތަ ދުވަހުގެ ކުރިން ކާޑު ހެއްދުމަށް ހުށަހެޅަން ވަނީ އެދިފައެވެ. އަދި ޖެނުއަރީ މަހުގެ 22 ވަނަ ދުވަހުން ފެށިގެން އެފަދަ ފަރާތްތަކަށް ކާޑު ހަދައި ދެވޭނީ އެ ފަރާތްތަކަށް މަޖިލިސް އިންތިޚާބުގައި ވޯޓު ނުލެވެވުނު ނަމަވެސް އެ ފަރާތްތަކުން އިއުތިރާޒު ނުކުރާކަމުގައިވާނަމަ ކަމަށެވެ.

ކުރިއަށް އޮތް ރައްޔިތުންގެ މަޖިލިސް އިންތިހާބު ބާއްވަން ހަމަޖެހިފާވަނީ މާރޗު މަހުގެ 17 ވަނަ ދުވަހުއެވެ.