ބައިނަލްއަގުވާމީ ގޮތުން ފާހަގަކުރާ ކަނޑުގެ ދުވަސް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ފާހަގަކުރަމުން ގެންދާއިރު މަސްވެރިންނަށް ފައިސާ ދީފައިނުވާކަން ހާމަވެއްޖެއެވެ.
ކަނޑުގެ ދުވަސް ފާހަގަކުރުމަށްޓަކައި އެ ވުޒާރާއިން އިސްނަގައިގެން ހަރަކާތްތަކެއް ކުރިޔަށް ވަނީ ގެންގޮސްފައެވެ.
އެގޮތުން މަސް ރޭހެއް ވެސް ވަނީ ކުރިޔަށް ގެންގޮސްފައެވެ.
ކަނޑުގެ ދުވަސް ފާހަގަކުރަމުންދާއިރު އެ ކަނޑު މަތީ މަސްވެރިން ކުރާ މަސައްކަތުގެ އުޖޫރަ ދިނުމަށް ސަރުކާރުން ފަސްޖެހޭތީ ގިނަ ބައެއްގެ ފާޑުކިޔުން އަންނަނީ މަސްވެރިކަމާ ބެހޭ ވުޒާރާގެ ވަޒީރަށާއި ރައީސް މުއިއްޒަށް އަމާޒުވަމުންނެވެ.
މަސްވެރިންނަށް ފައިސާ ދިނުމުގެ ބަދަލުގައި މި ދުވަސް ފާހަގަކުރުމުގެ ނަމުގައި ވެސް ވަނީ ދައުލަތުގެ ފައިސާއިން ބޮޑެތި ޚަރަދުތައްކޮށްފައެވެ.
މަސްވެރިންނަށް ފައިސާ ދިނުމުގައި މި ސަރުކާރުން އިހުމާލުވާއިރު މި ސަރުކާރު ވެރިކަމަށް އައީ މަސްކިރާތާ 48 ގަޑިއިރު ތެރޭ މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.
އެންމެ ފަހުން މަސްވެރިންނަށް ފައިސާ ދީފައިވަނީ އޭޕްރިލް މަހުގެ 22 ވަނަ ދުވަހުގައި ކަމަށް ވަޒީރު އަހުމަދު ޝިޔާމް ވަނީ ވިދާޅުވެފައެވެ.
އެހެންކަމުން މަސްވެރިންނަށް ފައިސާ ނުލިބި މަހަކަށްވުރެ ގިނަ ދުވަސްވެފައިވާތީ މަސްވެރިން އަންނަނީ ފައިސާ އަވަސް މުއްދަތެއްގައި ދިނުމަށް ގޮވާލަމުންނެވެ.
ނަމަވެސް ފައިސާ ދެވޭނެ ދުވަހެއް ސަރުކާރަށް ބުނެދެވިފައިނުވެއެވެ.
