ހަޔާ އެޑިއުކޭޝަންގެ ސްޓޭޓް މިނިސްޓަރު ފައިރޫޝް އިޒްރޭލުގެ ޕާސްޕޯޓު މަނާކުރުމާއި ދެކޮޅު ކަމަށް ޓްވިޓަރގައި ހާމަކޮށްފިއެވެ.
ފާރިސް މައުމޫން ކޮށްފައިވާ ޕޯސްޓަކަށް ޖަވާބު ދެއްވަމުން ފައިރޫޝް ވަނީ އިޒްރޭލުގެ ޕާސްޕޯޓް މަނާ ނުކުރަންވީ ސަބަބުތައް ހާމަކޮށްފައެވެ. މީގެ ތެރޭގައި ގައުމުގެ ސަލާމަތާއި ރައްކާތެރިކަން ނެތިގެންދާނެ ކަމަށާއި، އިޤްތިސާދީ ގޮތުން ރާއްޖެ ހީނާރުވެގެން ދާނެ ކަމަށް ފައިރޫޝް ހާމަކޮށްފައިވެއެވެ. މީގެ އިތުރުން ޑުއަލް ސިޓިޒަންޝިޕަށްވެސް މަގު ފަހިވެގެންދާނެ ކަމަށްވެސް ބުނެފައިވެއެވެ.
މުސްލިމް ގައުމެއްގެ ދިފާއުގައި މުޅި ދިވެހިރާއްޖެ ތެދުވެފައިވާއިރު، ސަރުކާރުން އެ ބުނާ ސްޓޭންޑަކީ މިއީތޯ އާންމުން އަންނަނީ ސުވާލުކުރަމުންނެވެ. ސަރުކާރުގެ ޒިންމާދާރު މަގާމެއްގައި ހުރި ފަރާތެއް ފާޅުކަން ބޮޑު ގޮތެއްގައި ސޯޝަލް މީޑިޔާގައި ފަލަސްތީނާއި ދެކޮޅަށް ވާހަކަދެއްކުމުން ސަރުކާރަށާއި ފައިރޫޝް އަށް އަންނަނީ ވަރަށް ބޮޑަށް ފާޑު ވިދާޅުވަމުންނެވެ.
އިޒްރޭލުގެ ޕާސްޕޯޓް މަނާކުރުމަށް ސަރުކާރުން ނިންމާ އިއުލާން ކުރި ކަމުގައި ވިޔަސް، އެކަމަށް އެކަށޭނަ މަސައްކަތްތަކެއް ކުރައްވަމުން ގެންދަވާ ތަނެއް ނުފެނެއެވެ.
