ސަރުކާރުގެ ޚަރަދުތައް ބޮޑުވެ މާލީ ހާލާތު ދަށަށް ދާން ފަށާފައިވާއިރު ޚަރަދު ކުޑަކުރުމަށް މުވައްޒަފުން ކަނޑާނެކަމުގެ އިޝާރާތެއް މާލީ ވަޒީރުކޮށްފިއެވެ.

ދައުލަތުގެ ހަރަދު ކުޑަކުރުމަށް މި ސަރުކާރުން އަޅަމުންދާ ފިޔަވަޅުތަކާ ގުޅޭގޮތުން އޮންލައިން ނޫހަކަށް ދެއްވި މައުލޫމާތުގައި މާލީ ވަޒީރު ޑރ. މުހައްމަދު ޝަފީގު ވިދާޅުވެފައިވަނީ، ސަރުކާރުގެ ވުޒާރާތަކާއި އިދާރާތަކުގެ އިތުރުން ސަރުކާރު ހިއްސާވާ ކުންފުނިތަކުގެ ހަރަދު ކުޑަކުރުމަށްވެސް މަސައްކަތްތަކެއް ކުރައްވަމުން ގެންދަވާ ކަމަށެވެ.

އެގޮތުން އިސްރާފު ހުންނަ ދިމަދިމާ ފާހަގަކޮށްގެން ޚަރަދުކުރުމަށް ސިޔާސީ މުވައްޒަފުން ހިމެނޭހެން މުވައްޒަފުން މަގާމުން ވަކިކުރުމަށް ޖެހިއްޖެ ހާލަތެއްގައި ވަކިކުރާނެ ކަމަށާ ނަމަވެސް އެއީ އެންމެ ފަހުން އަޅާނެ ފިޔަވަޅަކަށް ވާނެ ކަމަށް ވެސް ޝަފީގު ވިދާޅުވިއެވެ.

މީގެއިތުރުން ސަރުކާރުން ހަރަދުކުޑަކުރުމަށް ގެންގުޅޭ ސިޔާސަތުގެ ދަށުން އާސަންދަ އާއި ސަބްސިޑީތައް އިސްލާހުކޮށް އެސްއީތައް ރިފޯމްކުރުމަށް ރޭވެމުންދާ ކަމަށްވެސް މާލީ ވަޒީރު ވިދާޅުވިއެވެ.

ޚަރަދު ކުޑަކުރުމަށް މުވައްޒަފުން މަގާމުތަކުން ވަކިކުރުމުގެ ވިސްުން ސަރުކާރުގައި ހުރިކަން ހާމަވެފައިމިވަނީ، މިދިޔަ އަހަރުގެ ފުރަތަމަ ފަސް ދުވަހުގެ ތެރޭގައި ތަރައްގީގެ މަޝްރޫއުތައް ކުރިއަށްގެންދިއުމަށް ސަރުކާރުން ހޭދަކުރި އަދަދަށް ވުރެ މިއަހަރުގެ އެ މުއްދަތުގައި ހޭދަކުރި އަދަދު ދަށްވެ މުސާރަ ދިނުމަށް ހަމަ އެ މުއްދަތުގެ ތެރޭގައި ކުރި ހަރަދު ބޮޑުތަނުން އިތުރުވެފައިވާ ދަނޑިވަޅެއްގައެވެ.