މަޖިލިސް އިންތިހާބާ ދިމާކޮށް ލޯނުތަކާ ގުޅިގެން ރައީސް މުހައްމަދު މުއިއްޒު ވެވަޑައިގެންނެވި ވައުދުގައި ބޮޑު އޮޅުވާލުމެއްވާކަން ހާމަވެއްޖެއެވެ.

ތޭރަ އޮންލައިންނާ މައުލޫމާތު ހިއްސާކުރަމުން ކޮންސްޓްރަކްޝަން ދާއިރާގައި ހަރަކާތްތތެރިވާ ވިޔަފާރިވެރިއަކު ނަން ހާމަނުކުރުމަށް އެދި މައުލޫމާތު ދީފައިވާ ގޮތުގައި، މަޖިލިސް އިންތިހާބުގެ ކެމްޕެއިން ތެރޭގައި ލ. އަތޮޅަށް ވަޑައިގެން ރައީސް މުއިއްޒުވަނީ ކޮވިޑުގެ ތެރޭގައި ރައީސް އިބްރާހިމު މުހައްމަދު ސޯލިހުގެ ސަރުކާރުން ދޫކުރި ލޯނުތަކުގެ އިންޓްރެސް މައާފުކޮށްދޭނެ ކަމަށް ވައުދުވެވަޑައިގެންފައިކަމަށެވެ.

އެގޮތުން ކުޑަ އީދު ބަންދު ނިމުމާ އެކު އެކަންކަމަށް އިންތިޒާމު ހަމަ ޖެހިގެން ދާނެ ކަމަށް ވެސް ރައީސް މުއިއްޒު ވިދާޅުވިކަމަށް އެމީހާ ވަހީ ކިޔައިދިފައެވެ. އަދި ރައީސްގެ ވައުދާ އެއްގޮތަށް ލޯނުތަކުގެ ކަންކަން ހަމަ ޖެހިގެން ދާނެ ކަމަށް ބުނެ އެސްޑީއެފްސީއިންވެސް އިއުލާނެއް ޝާއިއު ކުރި ކަމަށާ ނަމަވެސް އެ އިއުލާނުގެ ދަށުން އެކަމަށް އެދި އޭނާ އެޕްލައި ކުރުމުން ލިބުނު ޖަވާބަކީ ބޭންކް އޮފް މޯލްޑިވްސްއިން ނަގާފައި ހުރި ލޯނުތަކުގައި މުއާމަލާތްކުރަން ޖެހޭނީ ބޭންކު އޮފް މޯލްޑިވްސްއާ ކަމަށެވެ. އަދި އޭނާ ނަގާ ފައި އޮތް ލޯނަކީ 5 ލައްކައަށް ވުރެ ބޮޑު ލޯނެއްކަމަށާ އެސްޑީއެފްސީއިން ދޫކުރީ 5 ލައްކައަށް ވުރެ ކުދި ލޯނުތަކެއް ކަމަށް އެސްޑީއެފްސީއިން ބުނެފައިވެއެވެ.

އެމީހާ ވަނީ ބީއެމްއެލާވެސް މިކަމުގައި މައުލޫމާތު ހިއްސާކޮށްފައި ކަމަށާ ބީއެމްއެލުން ހާމަކުރި ގޮތުގައި އެފަދަ ކަމެއް ރައީސް އޮފީހުން އަދި މިހާތަނަށް އެ ބޭންކާ އެކު ހިއްސާކޮށް އަންގާފައިނުވާ ކަމަށެވެ. އެކަމުގެ ޖަވާބެއް ހިދާލަން ރައީސް އޮފީހުން ގުޅުމުން ޚާލިދާ ކިޔާ ބޭފުޅަކު ވަނީ އެކަމުގެ ޝަކުވާ ރައީށް އޮފީހަށް ލިބެމުންދާ ކަމަށާ ނަމަވެސް އަދި ބީއެމްއެލްއާ އެކު އެއްބަސްވުމަކަށް އެކަމުގައި އާދެވިފައިނުވާކަމަށް ވިދާޅުވެފައިކަމަށް ވެސް އެމީހާ ވަނީ ތޭރަ އޮންލައިނަށް މައުލޫމާތު ހިއްސާކޮށްފައެވެ. އަދި ރައީސްގެ ވައުދެއްކަން އެނގޭކަމަށްވެސް އެ މުވައްޒަު ބުނި ކަމަށްވެސް އެމީހާ ވަނީ ކިޔައިދިފައެވެ.

ލޯންތަކުގެ އިންޓަރެސްޓާ ގުޅުވާ ރައީސް މުއިއްޒު ވައުދުވެވަޑައިގެންނެވީ މި އަހަރުގެ އެޕްރިލް މަހުގެ 11 ވަނަ ދުވަހު، ލ. ފޮނަދޫގައި ވާހަކަ ދައްކަވަމުންނެވެ. އެއީ މިހާރުގެ މަޖިލިސްގެ ރައީސް ގޮނޑި ފުރުއްވަމުން ގެންދަވާ ދާއިރާއެވެ.