މަސްވެރިންނަށް ފައިސާ ނުދީ މަސް ދުވަސް ފާއިތުވެފައިވާތީ ގދ މަޑަވެލީގެ މަސްވެރިން އިހުތިޖާޖް ކުރަން ނިންމައިފިއެވެ.

މަޑަވެލި މަސްވެރިންނާ، މަސްވެރި އާއިލާތަކުން ވަނީ މާދަމާ ހެނދުނު 9:00 ޖަހާއިރު މަޑަވެލި ކައުންސިލް ކުރިމަތީ އިހުތިޖާޖް ކުރުމަށް ނިންމާފައެވެ.

އިހުތިޖާޖް ކުރުމަށްޓަކައި މަޑަވެލީގެ ކުދި ބޮޑު އެންމެން އަންނަނީ ތައްޔާރީތައް ވަމުންނެވެ.

"ތޭރަ އޮންލައިން" އަށް މައުލޫމާތޫ ދެމުން މަޑަވެލީގެ މަސްވެރިއެއް ބުނީ ކުރީ ސަރުކާރުން މަސްވެރިންނަށް ފައިސާ ނުދީ އިހާނަތިކޮށް ކަންތައް ކުރެއްވިކަމަށް ވާހަކަތައް ދައްކާފައި މި ސަރުކާރު އައީ މަސްވެރިންނަށް ބޮޑެތި ވައުދުތަކެއް ވުމަށްފަހުގައި ކަމަށެވެ.

ނަމަވެސް ފެނިގެންދަނީ މަސްވެރިންނަށް ފައިސާ ދިނުމުގައި އިހުމާލުވަމުންދާ މަންޒަރުކަމަށް ވެސް އެ ފަރާތުން ވަނީ ބުނެފައެވެ.

20 ވަނަ ރައްޔިތުންގެ މަޖިލިސް އިންތިޚާބްގައި ސަރުކާރަށް ސުޕާރ މެޖޯރިޓީ ހޯދުމުގެ ބޭނުމުގައި މަސްވެރިން ގުނބޯ ހެއްދުމަށްފަހު މަސްވެރިންނަށް ފައިސާ ދިން ކަމަށް އެ ފަރާތުން ވަނީ ބުނެފައެވެ.

ނަމަވެސް އޭގެ ފަހުން މަސްވެރިން ކިރި މަސްތަކަށް ފައިސާ ނުދީ މަހަކަށް ވުރެ ގިނަ ދުވަސްވެފައިވާކަމަށް ވެސް އެ މަސްވެރިޔާ ވަނީ ބުނެފައެވެ.

ކުރިޔަށް އޮތީ އީދުކަމުން، ގެޔަށް ވަންނަ ކޮންމެ ފަހަރަކު ދަރިން އީދު ހެދުން ލިބޭނެ އިރެެއް ވެސް އަހާ ކަމަށާއި އެ ދަރިންނަށް ދޭނެ ޖަވާބެއް ނެތީވެސް އަދުގެ ސަރުކާރުގެ ވެރިންގެ ސަބަބުން ކަމަށް ވެސް އެ މަސްވެރިޔާ ވަނީ ބުނެފައެވެ.

މަސްވެރިންގެ ހައްގުގައި ފައިސާ ބޭނުންވާތީ އަޑު އުފުލަމުން ގެންދާތީ ސަރުކާރުގެ އިސްވެރިންގެ ޕްރެޝަރ މަޑަވެލީގެ މަސްވެރިންނަށް ކުރަމުންދާކަމުގެ މައުލޫމާތު ވެސް ތޭރަ އޮންލައިން އަށް މަޑަވެލީގެ މަސްވެރިޔާ ވަނީ ދީފައެވެ.

އަދުގެ މަސްވެރިކަމާ ބެހޭ ވުޒާރާގެ ވަޒީރު އަހުމަދު ޝިޔާމަކީ 19 ވަނަ ރައްޔިތުންގެ މަޖިލީހުގައި މެމްބަރަކަށް އިންނަވާ އެންމެ އަޑު ހަރުކޮށް މަސްވެރިންގެ ހައްގުގައި ވަކާލާތު ކުރެއްވި ފަރާތެކެވެ.

ނަމަވެސް މިއަދު މަސްވެރިންނަށް ފައިސާ ނުލިބި މަސްވެރިން އާދޭސް ކުރަމުން ގެންދާއިރު ވެސް އެ ބޭފުޅާ ހުންނެވީ ހަނެވެ.

މަޑަވެލި ރައްޔިތުންނަކީ އަދި ހާއްސަކޮށް މަސްވެރިންނަކީ އަދުގެ ރައީސް ޑރ މުހައްމަދު މުއިއްޒުގެ ސަރުކާރުގެ ގެނައުމަށްޓަކައި އެންމެ ބުރަ މަސައްކަތް ކުރި ފަރާތްތަކެކެވެ.

ނަމަވެސް މިއަދު އެ ފަރާތްތަކުގެ މަތިން ރައީސް މުއިއްޒު ހަނދާނެއް ނެތެވެ.

ވެރިކަމަށް އައީ މަސްވެރިންނަށް މަސް ކިރާތާ 48 ގަޑިއިރު ތެރޭގައި ފައިސާ ދޭނެކަމުގެ ވައުދާއެކުގައެވެ. ނަމަވެސް މަސް ދުވަސް ވެގެންދާއިރުވެސް އެ މަސްވެރިންނަށް ފައިސާ ނުދެވޭކަން ފާހަގަކޮށްލެވެއެވެ.

މިކަމާ ރާއްޖޭގެ އެކި ކަންކޮޅުތަކުގައި ތިބި މަސްވެރިން އަންނަނީ ކަންބޮޑުވުން ފާޅުކުރަމުންނެވެ.