ރައީސް އޮފީހުން އާރުޓީއައި ގާނޫނަށް ތަބާ ނުވާތީ މައްސަލަ ބަލަން ނިންމާފައިވަނިކޮށް ގާނޫނަށް އިސްލާހު ގެންނަން ސަރުކާރުން ރައްޔިތުންގެ މަޖިލީހަށް ހުށަހަޅައިފިއެވެ.

ރައްޔިތުންގެ މަޖިލީހުގެ ފުރަތަމަ ދައުރަށް ސަރުކާރުން އިސްލާހު ހުށަހެޅި ބިލުތަކާ އެކު 37 ބިލެއް މަޖިލީހަށް ހުށަހަޅާފައިވެއެވެ. އޭގެ ތެރޭގައި މައުލޫމާތު ހޯދައި ލިބިގަތުމުގެ ހައްގުގެ ގާނޫނަށް އިސްލާހު ގެނައުމުގެ ބިލު ވެސް ހިމެނެއެވެ.

އާރުޓީއައި ގާނޫނަށް އިސްލާހު ގެންނަން ހުށަހަޅާފައިވަނީ ޑިމޮކްރެޓިކް ވެށްޓަކަށް ފެއްތުމަށް ކަމަށް ރައީސް އޮފިހާ ހަވާލާދީ އޮންލައިން ނޫސް "އަދުދު"ގައި ރިޕޯޓުކޮށްފައިވެއެވެ.

އެގޮތުން ރައީސް އޮފީހުގެ އިސް ތަރުޖަމާނު ހީނާ ވަލީދު އާ ހަވާލާދީ "އަދަދު"ގައި ރިޕޯޓުކޮށްފައިވާ ގޮތުގައި އާރްޓީއައި ގާނޫނު އިސްލާހު ކުރުމުގެ ހަމައެކަނި ބޭނުމަކީ އެ ގާނޫނު ތަންފީޒު ކުރުމުގައި ޑިމޮކްރެޓިކް ވެށްޓަކަށް ފެއްތުން ކަމަށެވެ.

ޑިމޮކްރެޓިކް ވެށްޓަކަށް ފެއްތުމުގެ ނަމުގައި އާރުޓީއައި ގާނޫނަށް އިސްލާހު ގެެންނަން ހުށަހަޅާފައިމިވަނީ މައުލޫމާތު ހޯދާ ލިބިގަތުމުގެ ގާނޫނުގެ ދަށުން އެތައް މައުލޫމާތެއް ހޯދަން ރައީސް އޮފީހަށް އެކި ނޫސްވެރިންނާ ނޫސްވތަކުވެސް ހުށަހަޅާ މައުލޫމާތު ދޭން ޖެހޭ މުއްދަތު ފަހަނަ އަޅާ ގޮސް އިންފޮމޭޝަން ކޮމިޝަނަރުގެ އޮފީހުން އެ މައްސަލަތައް ބަލަން ބޭއްވި އަޑު އެހުންތަކަށްވެސް ރައީސް އޮފީހުން ހާޒިރުނުވުމުން ރައީސް އޮފީހާ މެދު ފިޔަވަޅު އެޅުމަށް އައިކޮމްއިން ނިންމާފައިވަނިކޮށްކަން ފާހަގަކޮށްލެވެއެވެ.

މައުލޫމާތު ހޯދާ ލިބިގަތުމުގެ ގާނޫނުގެ އިތުރުންވެސް ނޫސްވެރިކަމަށް ދަތިކުރުމުގެ ނިޔަތުގައި ސަރުކާރުން އިތުރު ދެ ބިލެއްގެ އިސްލާހު ހުށަހަޅާފައިވެއެވެ. އޭގެ ތެރޭގައި ބްރޯޑްކާސްޓްކުރުމުގެ ގާނޫނަށް އިސްލާހު ގެނައުމުގެ ބިލާ މޯލްޑިވްސް މީޑިއާ ކައުންސިލްގެ ގާނޫނަށް އިސްލާހު ގެނައުމުގެ ބިލު ހިމެނެއެވެ.

ނޫސްވެރިކަމަށް އިމެއް ނެތް މިންވަރަށް ފުރުސަތު ދިނުމަކީ ރައީސް މުހައްމަދު މުއިއްޒުގެ ވައުދެއް ނަމަވެސް އެމަނިކުފާނުގެ ސަރުކާރުން ގެންދަވަނީ ނޫސްވެރިންނަށް އެކި އެކި ތުރާ ޖައްސަމުންނެވެ. އެގޮތުން ދާދި ފަހުން ރައީސް އޮފީހަށް ނޫސްވެރިންނަށް ފޯނު ވެއްދުން މަނާކުރިއެވެ. ނަމަވެސް ފާޑުކިޔުން އަމާޒުވުމުން އެކަން ކެންސަލްކޮށްފައިވެއެވެ.