މަސްވެރިންގެ ހުރި ކަންބޮޑުވުންތަކާއި ޑިމާންޑުތަކަށް ސަރުކާރުން ސީދާ ވަކި ޖަވާބެއް ލިބެންދެން މިއަދު ފެށި އިހުތިޖާޖު ނުހުއްޓާނެ ކަމަށް ބޮޑު ކަންނެލި މަސްވެރިންގެ ޔޫނިއަން އިން ބުނެފިއެވެ.

މަސްވެރިންނަށް ފައިސާ ނުދޭތީ އެ އަޑު ސަރުކާރަށް އިއްވުމަށް 50 ވަރަކަށް ދޯނީގައި ކަންނެލި މަސްވެރިން އަންނަނީ އިހުތިޖާޖު ކުރަމުންނެވެ.

އިހުތިޖާޖް ފަށާފައިވަނީ މިއަދު ހެނދުނު ހުޅުމާލޭ ހުޅުމާލޭ ކަންނެލި ޖެޓީ ސަރަހައްދުންނެވެ. އަދި ފަހުން މާލޭ 1 ނަންބަރު ފާލަން ސަރަހައްދަށް ވަނީ ބަދަލުކޮށްފަ އެވެ.

 މަސްވެރިންގެ ކަންބޮޑުވުންތައް އައްސަވަން ފިޝަރީޒް މިނިސްޓަރު އަހްމަދު ޝިޔާމް އިންކާރު ކުރި ނަމަވެސް ފަހުން ވަނީ މިއަދު ހަވީރު އެ ސަރަހައްދަށް ވަޑައިގެންފަ އެވެ.

މަސްވެރިންނަށް ފައިސާ ނުދެވި ބެކް ލޮގްގައި 80 މިލިއަން ރުފިޔާ ހުރި އިރު މި ފައިސާ ދެވޭނެ ސީދާ ދުވަހެއް ވެސް ސަރުކާރަށް ބުނެދިވިފައިނުވެއެވެ.

މި ހަފްތާ ތެރޭ 80 މިލިއަން ތެރެއިން އެއްބައި ދޭނެ ކަމަށް ބުނި ނަމަވެސް މި ހަފްތާގެ ސީދާ ކޮން ދުވަހެއް ކަމެއް ވެސް ސަރުކާރުން ހާމަކޮށްފައިނުވެއެވެ.

މި ސަރުކާރުން ވެރިކަމަށް އައީ މަސް ކިރާތާ 48 ގަޑި އިރު ތެރޭގައި މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.

ނަމަވެސް ފެނިގެންދަނީ މަސްވެރިންނަށް މަސް ދެމަސް ވާއިރުވެސް ފައިސާ ނުދެވޭ މަންޒަރެވެ.

މިކަމުގެ ސަބަބުން ރާއްޖޭގެ އެކި ކަންކޮޅުތަކުގައި ތިބޭ މަސްވެރިން އަންނަނީ ކަންބޮޑުވުން ފާޅުކޮށް ވަގުތުން ފައިސާ ދިނުމަށް ގޮވާލަމުންނެވެ.