ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން ޕަބްލިކް ސަރވިސް މީޑިއާއިން ކުރިއަށް ގެންދާ "ފަލަސްޠީނާއެކު ދިވެހީން" ޓެލެތޯނުގައި ދިވެހިރާއްޖޭގެ ޤައުމީ ދިފާޢީ ބާރުން ފައިސާގެ އެހީ ހަދިޔާކޮށްފިއެވެ.

މިއަދުގެ 08:00 އިން މެންދަމު 00:00 އަށް ކުރިއަށް ގެންދާ މި ޓެލެތޯނުގައި، ދިވެހިރާއްޖޭގެ ޤައުމީ ދިފާޢީ ބާރުން ވަނީ ޖުމްލަ 2,169,826.32 (ދެމިލިއަން އެއްލައްކަ ފަސްދޮޅަސް ނުވަހާސް އަށްސަތޭކަ ސައްބީސް ރުފިޔާ ތިރީސް ދެލާރި) ރުފިޔާ، ފަލަސްތީނު ފަންޑަށް ހަދިޔާ ކޮށްފައިވާކަމަށް އެ އިދާރާއިން ހާމަކޮށްފައިވެއެވެ.

ސިފައިންގެ ފަރާތުން ހަދިޔާކުރި މި ފައިސާގެ އެހީ އެ ފަންޑަށް ހަވާލުކޮށްދެއްވީ، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ. ޗީފް އޮފް ޑިފެންސް ފޯސްގެ އަރިހުގައި، މިނިސްޓަރ އޮފް ޑިފެންސް، އޮނަރަބަލް މުޙައްމަދު ޣައްސާން މައުމޫންއާއި، ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޡް މި ފައިސާ ހަދިޔާކުރުމުގެ އިވެންޓްގައި ބައިވެރިވެ ވަޑައިގެންނެވިއެވެ.

ފަލަސްތީނަށް އެހީވުމަށް ބާއްވާ މި ޓެލެތޯންގައި މާލޭގެ 13 ސަރަހައްދެެއްގައި ފަންޑް ފޮށި ބަހައްޓާފައިވެއެވެ.