މާލެ ހުޅަނގު ބަނދަރުގައި އޮތް ލޯންޗެއްގައި އަލިފާން ރޯވުމުން އެމްއެންޑީއެފްއިން އެ އަލިފާންގަނޑު ނިއްވާލައިފިއެވެ.

މި ހާދިސާގެ ރިޕޯޓު ލިބިފައި ވަނީ ބުދަ ދުވަހުގެ ރޭ ދަންވަރު 00:42 ހާއިރު ކަމަށް އެމްއެންޑީއެފްއިން ވަނީ ބުނެފައިއެވެ. ހާދިސާ ހިނގާފައި ވަނީ މާލެ ދެކުނުފަރާތު ބޭރުތޮށިކަައިރި ފަތާ ޓްރެކް ކައިރީގައިއެވެ.

އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށްވެސް އެ އިދާރާއިން ވަނީ ބުނެފައިއެވެ.

މިގޮތުން އެފްއާރުއެސްގެ ފަޔަރ ފައިޓަރުން ކުރި މަސައްކަތުން ލޯންޗުގައި ރޯވެފައި ހުރި އަލިފާން ނިއްވާލެވުނީ ބުދަ ދުވަހުގެ ރޭ 00:56 ހާއިރުއެވެ.

މި ހާދިސާގައި އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައެއް ނުވާކަމަށް އެމްއެންޑީއެފްއިން ވަނީ ބުނެފައިއެވެ.