އިހުތިޖާޖަށް ނިކުމެ ފައިސާ ވީއެންމެ އަވަހަކަށް ދޭން ގޮވާލުމާއެކު މަސްވެރިންނަށް ދޭން ޖެހޭ 80 މިލިއަން ރުފިޔާގެ ތެރެއިން 46 މިލިއަން ރުފިޔާ މިއަދު ދީފައިވާނެ ކަމަށް ސަރުކާރުގެ މަސް ކުންފުނި "މިފްކޯ" އިން ބުނެފިއެވެ.

މިފްކޯގެ ޑީއެމްޑީ އިބްރާހިމް ސައީދު އެ ކުންފުނީގެ މީޑިޔާ ގްރޫޕަށް ފޮނުވި މެސެޖްގައި ވަނީ މަސްވެރިންނަށް ދޭން ޖެހޭ ފައިސާގެ ދެބައިކުޅަ އެއްްބައި މިއަދު ދެވިއްޖެކަމަށް ވިދާޅުވެފައެވެ.

އަދި ޕެންޑިންގައި ހުރި ފައިސާ ކްލިއަރކުރުމަށް ފިޝަރީޒް މިނިސްޓްރީއާއި ސަރުކާރުކާރާއިއެކު މިފްކޯއިން މަސައްކަތްތައް ކުރަމުންދާކަމަށް މައުލޫމާތު ދީފައިވެއެވެ.

މިފްކޯއިން ބުނެފައިވާގޮތުން ކްރެޑިޓް އަދަދަކީ މަސްކިރާ މިންވަރެއްގެ މައްޗަށް އިތުުރުވާނެ އެއްޗެއްކަމަށެވެ.

އެހެންކަމުން އަބަދުވެސް ދައްކަންޖެހޭނެ ފައިސާ ހުންނާނެކަމަށްވުމުން އެކަމަށް ހައްލެއް ހޯދުމަށް މަސައްކަތްކުރަމުންދާކަމަށާއި މިނިސްޓަރު ޝިޔާމްވަނީ 3 އަހަރުގެ ތެރޭގައި މިފްކޯއަށް ސަބްސިޑީ ނުދީ ކުރިއަށް ގެންދެވޭ މަގެއް ފަހިކުރައްވާނެކަމަށް ވިދާޅުވެފައިކަމަށްވެސް ބުނެފައިވެއެވެ.

މިފްކޯއިން ބުނެފައިވާގޮތުން އެ ކުންފުނިންދަނީ ކަނޑުއޮށްގިރީގައި ހުރި ފެސިލިޓީ ހުޅުމާޅެއަށް ބަދަލުކުރުމަށް ފިޝަރީޒް އާއިއެކު މަޝްވަރާކުރަމުންކަމަށެވެ.

އެހެންނަމަވެސް މިވަގުތު ކުންފުނިން 20 ރުފިޔާގެ ރޭޓުން މަސް ގަންނަމުންދާނެކަމަށާއި އެކަން ކުރާނީ ސަރުކާރުގެ ސަބްސިޑީގެ އެހީތެރިކަމާއިއެކުކަމަށް ބުނެފައިވެއެވެ.

އޭޕްރިލް 22 ވަނަ ދުވަހުގެ ފަހުން މަސްވެރިންނަށް ފައިސާ ނުދީ ގިނަ ދުވަސްވުމުން މަސްވެރިން ވަނީ އިއްޔެ ހުޅުމާލެ އާއި މާލޭގެ އެއްް ނަމްބަރު ޖެޓީ ސަރަހައްދުގައި ސުލްހަވެރި އިހުތިޖާޖެއް ވެސް ކުރިޔަށް ގެންގޮސްފައެވެ.

އެ އިހްތިޖާޖަށް މިނިސްޓާރ ޝިޔާމް ވަނީ ގޮސް މަސްވެރިންނަށްވީ ވައުދު ފުއްދޭނީ މާލީ ހާލަތު ރަނގަޅުވުމުން ކަމަށް ވެސް ވިދާޅުވެފައެވެ.