މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް (އެމްއެމްޕީއާރްސީ) ގެ މެނޭޖިންގ ޑިރެކްޓަރުގެ މަގާމަށް އިބްރާހިމް ޝިއުރީ އައްޔަންކޮށްފިއެވެ.

ޝިއުރީ މި މަގާމަށް އައްޔަންކޮށްފައިވަނީ ޕީސީބީ އިންނެވެ.

މިކަން އެމްއެމްޕީއާރްސީ އިން ވެސް ވަނީ "ތޭރަ އޮންލައިން" އަށް ކަށަވަރުކޮށްދީފައެވެ.

އެމްއެމްޕީއާރްސީގައި އެމްޑީއަކު ނެތި ފުދޭ ވަރަކަށް ގިނަ ދުވަސްތަކެއް ފާއިތުވުމަށްފަހު މިއަދު މިވަނީ އެ މަގާމަށް ޝިއުރީ އައްޔަންކޮށްފައެވެ.

ޝިއުރީ މި މަގާމަށް އައްޔަންކުރުމުގެ ކުރިން ކުންފުނީގެ ކުރީގެ އެމްޑީ ކަމުގައި ހުންނެވީ ފާތިމަތު ތައުފީގް (ކުޑީ) އެވެ.

އެ މަގާމުގައި ކުރިން ހުންނެވި (ކުޑީ) އެ މަގާމުން 22 މެއި ވަނަ ދުވަހު ވަނީ ވަކި ކޮށްފައެވެ.

މައުލޫމާތު ލިބުނު ގޮތުގައި ކުޑީ ވަކިކޮށްފައިވަނީ އޭނާގެ މައްޗައް ވަރަށް ބައިވަރު ތުހުމަތުތަކެއް ކުރެވިގެންނެވެ.

އެގޮތުން ކުންފުނީގެ ފައިސާ އަމިއްލަ ބޭނުމަށް ބޭނުން ކުރުމާއި ކުންފުނީގެ މުވައްޒަފުންނަށް ބިރު ދެއްކުން ހިމެނެއެވެ.

ކުޑީ މަަގާމުން ވަކި ކުރުމުގެ އެއް ދުވަސް ކުރިން އެ ކުންފުނީގެ ޗެއާރ ޕާސަން ކަމުގެ މަގާމްގައި ހުންނެވި އައިޝާ ނޫރްއައިން ޖަނާހް ވަނީ މަގާމުން އިސްތިއުފާ ދެއްވާފައެވެ.

ތޭރަ އޮންލައިން އަށް މައުލޫމާތު ލިބުނު ގޮތުގައި ނޫރްއައިންގެ އިސްތިއުފާ އާއި ކުޑީ މަގާމުން ވަކި ކުރުމާ ކޮންމެވެސް ގުޅުމެއް އޮވެއެވެ.

ކުޑީ މަގާމުން ވަކި ކުރުމަށްފަހު ކުންފުނީގެ ކަންކަން ވަގުތީ ގޮތުން ހަވާލުކޮށްފައިވަނީ ޖިންސީ ފުރައްސާރައިގެ ތުހުމަތު ކުރެވިފައިވާ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު ބައްސާމް އާދަމާއެވެ.