ޑިންގީއެއްގައި ލ.އަތޮޅު މާމެންދޫއަށް ދަތުރު ކުރަމުން ދަނިކޮށް 2019 އަހަރުގެ ފެބްރުއަރީ 22 ވަނަ ދުވަހުގެ ރޭ ގެއްލުނު މަރިޔަމް ޝިމާ ގެއްލުނު މައްސަލަ އަލުން ރިވިއު ކުރުމަށް ނިންމާފައިވާ ކަމަށް ފުލުހުން ހާމަކޮށްފިއެވެ.

މި މައްސަލައިގައި ފުށު އެރުންތައް ހުރުމާއި އެކު އިތުރަށް މައްސަލަ ރިވިއު ކުރަން ނިންމީ ކަން ފުލުހުން ހާމަކޮށްފައިވަނީ އެ މުއައްސާސާއިން ބޭއްވި ނޫސްވެރިންގެ ބައްދަލުވުމެެއްގައެވެ.

ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމެންޓްގެ ޗީފް އިންފެކްޓާ މުހައްމަދު ސާމިހް އާ "ވަގުތު" އިން މި މައްސަލަ އާއި ގުޅިގެން ސުވާލު ކުރުމުން ވިދާޅުވީ މި މައްސަލަ އެއްކޮށް ފައިލް ނުކުރާ ކަމަށެވެ. ސާމިހް ވިދާޅުވީ މި މައްސަލަ އަލުން ރިވިއު ކުރުމުގެ މަރުހަލާގައި އޮތް ކަމަށެވެ. ނަމަވެސް މިކަމާ ގުޅޭ އިތުރު ތަފުސީލެއް އަދި މި މައްސަލަ އަލުން ރިވިއު ކުރަނީ ކީއްވެގެން ކަމެއް ހާމައެއް ނުކުރިއެވެ.

ޝިމާ ގެއްލުނީ އުމުރުން 24 އަހަރުގެ ފިރިހެނެއް ކަމަށްވާ ފަޒީލް އާއި އެކު ދަތުރު ކުރަމުން ދަނިކޮށެވެ. ޑިންގީ ބަންޑުން ޖަހާލި ހާދިސާ އިން ފަޒީލް ވަނީ ސަލާމަތްވެފައެވެ. ފަޒީލް ސަލާމަތްވީ ޑިންގީ ބަންޑުން ޖަހާލުމުން ފަތާފައި ސިކްސް ސެންސަސް ރިސޯޓަށް އަރައިގެން ކަމަށް ވެއެވެ. ނަމަވެސް ގިނަ ބަޔަކު ބުނާ ގޮތުގައި އެ ސރަަހއްދުން އެހަ ވިއްސާރަ ރެއަކު ފަތާފައި ދިއުމަކީ ނާދިރު ކަމކެވެ.

މި މައްސަލައިގެ ފުރިހަމަ ތަހުގީގެެއް ހިންގުމަށް ޝިމާގެ އާއިލާއިން އަންނަނީ ގޮވާލަމުންނެވެ.