ބޮޑު އީދު ދުވަހުގެ ހަވީރު މާލޭގެ މަގުތަކުގައި ވެހިކަލް ދުއްވުން މަނާކޮށްފިއެވެ.

މިކަން މަނާކޮށްފައިވަނީ މާލެ ސިޓީ ކައުންސިލުންނެވެ.

އެގޮތުން އެ ކައުންސިލުން ބުރާސްފަތި ދުވަހު ކުރި އިއުލާނެއްގައި ވަނީ އީދު ދުވަހުގެ ހަވީރު 4:00 އިން 6:00 އަށް މާލެ އާއި ވިލިމާލެ އަދި ހުޅުމާލޭގައި ހިމެނޭ އާންމު ހުރިހާ މަގުތަކަކީ ވެހިކަލް ދުއްވުމަކީ މަނާ ކަމެއް ކަމަށެވެ. އަދި އެގޮތަށް ނިންމީ ބުރާސްފަތި ދުވަހު ބޭއްވި އެ ކައުންސިލްގެ ޖަލްސާގައި ކަމަށް ވެސް އިއުލާންގައިވެއެވެ.

އެ ގަޑިތަކުގައި އިމަޖަންސީ ހާލަތުގައި ދަތުރުކުރަން ހާއްސަ ސްޓިކާއެއް ކައުންސިލުން ދޫކުރާނެ ކަމަށާއި އެ ސްޓިކާ ލިބޭނީ ކައުންސިލުގެ އާންމު ހިދުމަތާއި ބެހޭ ބައިން (ތައިސޭކޮށި، މާލެ) ކަމަށް ކައުންސިލުން ބުނެ އެވެ.

ސްޓިކަރ ދޫކުރުމަށް ހަމަޖެހިފައިވަނީ މިއަދު މެންދުރު ފަހު 2:00 އިން ހަވީރު 4:00 އަށް އަދި ރޭގަނޑު 9:00 އިން 11:00 އަށެވެ. މީގެ އިތުރުން ހޮނިހިރު ދުވަހު ހެނދުނު 10:00 އިން މެންދުރު ފަހު 2:00 އަދި ރޭގަނޑު 9:00 އިން 11:00 އަށްވެސް ސްޓިކަރ ދޫކުރުމަށް ހަމަޖެހިފައިވެއެވެ.

މާލެ ސިޓީ ކައުންސިލުގެ އެންގުމާ ހިލާފުވާ މީހުންނާ މެދުގައި ގާނޫނީ ފިޔަވަޅު އަޅާނެ ކަމަށް އެކައުންސިލުން ހާމަކޮށްފައިވެއެވެ.

އާންމުގޮތެއްގައި އީދު ދުވަސްތަކުގެ ހަވީރަކީ މާލޭގައި ހަމައެކަނި ފައިމަގުގައި އުޅެވޭ ވަގުތެއްކަމުގައި ކަނޑައަޅައެވެ.