ވެލާނާ އިންޓަރނޭޝަނަލް އެއާޕޯޓު ތަރައްގީކުރުމަށް ރައީސް އަބްދުﷲ ޔާމީން ޕްލޭންކޮށް ފެއްޓެވި މަޝްރޫއަށް ކުދި ކުދި ބަދަލުތައް ގެނެސް އަނެއްކާވެސް މި ސަރުކާރުން އެ މަޝްރޫއު ލޯންޗުކޮށްފިއެވެ.

ބަދަލުތަކާ އެކު މަޝްރޫއު އަލުން ލޯންޗުކުރީ ބުރާސްފަތި ދުވަހުގެ ރޭ ދަރުބާރުގޭގައި އޮތް ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މުޅި މަޝްރޫޢުގެ މަސައްކަތް ނިމޭއިރު ޚިދުމަތްތަކާއި ވަޞީލަތްތައް ތަރައްޤީކުރެވި، އެއަދަދު ޖުމްލަ 25 މިލިޔަނަށް އިތުރުވެގެންދާނެކަމަށް ހާމަކޮށްފައިވެއެވެ.

މަޝްރޫޢުގެ ފުރަތަމަ ފިޔަވަހީގައި ހިމެނޭ މަސައްކަތްތައް މިއަހަރު ފެށިގެންދާއިރު މުޅި މަޝްރޫޢުގެ ބޮޑުބައި މި ފަސްއަހަރުގެ ތެރޭގައި ނިންމައި 10 އަހަރުގެ ތެރޭގައި މަޝްރޫޢުގެ އެންމެބޮޑެތި މަސައްކަތްތައް ނިންމަވަން ރާވާފައިވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

މަޝްރޫއަށް ގެނައި ބައެއް ބަދަލުތަކުގެ ތެރޭގައި މިހާރުގެ ސީޕްލޭން ޓަރމިނަލް އެހެންތަނަކަށް ބަދަލުކުރުމާއި، ޖެޓްތަކަށް ޚާއްޞަ ޓަރމިނަލެއް ހެދުމާއި، ގަޑިއަކު 2000 ފަސިންޖަރުންނަށް ޚިދުމަތްދެވޭ ވަރަށް ޑޮމެސްޓިކް ޓަރމިނަލް ތަރައްޤީކުރުމާއި، ކާގޯ ފެސިލިޓީ ތަރައްޤީކުރުމާއި އަދި ފުނަދޫގައި ހުންނަ ތެޔޮ ސްޓޯރޭޖް އެހެންތަނަކަށް ބަދަލުކޮށް އެރަށް އިންޓަރނޭޝަނަލް ފައިނޭންޝަލް ސެންޓަރެއްގެ ގޮތުގައި ތަރައްޤީކުރުން ހިމެނެއެވެ. މީގެ އިތުރުން ފުނަދޫ، މަލެއާއި ހުޅުލެއާ ބްރިޖުން ގުޅުވާލުމާއި، ހުޅުލެއާއި ހުޅުމާލެއިން ސީޕްލޭން ޓަރމިނަލްއާވެސް ގުޅުވާލުމަށް ރާވާފައިވެއެވެ.

ވީއައިއޭ ތަރައްގީކޮށް ފަސިންޖަރުންނަށް ދޭ ހިދުމަތް ފުޅާކުރުމަށް ފަށާފައިވާ މަޝްރޫއަކީ ރައީސް ޔާމީންގެ ޒައާމަތުގައި އެމަނިކުފާނު ފައްޓަވާފައިވާ މަސައްކަތެކެވެ. އެގޮތުން އެމަނިކުފާނުގެ ޕްލޭނުގައި އޮތީ 7.2 މިލިއަނަށް ވުރެއް ގިނަ ޕަސެންޖަރުންނަށް ޚިދުމަތް ދެވޭނެ އުސޫލެކެވެ. އަދި އާ ޓާރމިނަލް އޭރިއާ އާއި އޭޕްރޭން ސަރަހައްދު ބޮޑު ކުރުމުގެ މަސައްކަތް ވެސް ފެއްޓެވިއެވެ. އެއާއެކު ސީޕްލޭން ޕަސިންޖަރުންނަށްވެސް އައު ޓާމިނަލްއެއް ވަނީ ގާއިމްކޮށްދެއްވާފައެވެ. ވީއައިއޭ ތަރައްގީކުރުމަށް ރައީސް ޔާމީންވަނީ އެއް ބިލިއަނަށްވުރެ ގިނަ، ފައިސާގެ ބޮޑެތި މަޝްރޫއުތަކެއް ހިންގަވާފައެވެ.