1445 ވަނަ އަހަރުގެ އަޟްހާ އީދުގެ ހެޔޮއެދުމާއި ތަހުނިޔާ ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު އަރިސްކޮށްފިއެވެ.
އެމަނިކުފާނު މިފަދައިން ތަހުނިޔާ ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
އެގޮތުން އެ ޕޯސްޓްގައި އެމަނިކުފާނު ވަނީ ރާއްޖެއަށް ހިދުމަތްކުރެއްވި އެންމެހާ ފަރާތްތަކުގެ ތެރެއިން އެންމެ ކުލަގަދަކޮށް އީދު ފާހަގަކުރެއްވި އަދި ތަފާތެއް ދެއްކެވި ރައީސް އަބްދުﷲ ޔާމީން އަބްދުލްގައްޔޫމަށާއި އެމަނިކުފާނުގެ ޢާއިލާއަށް ހެޔޮއެދުމާ ތަހްނިޔާ އަރިސްކުރައްވާފައެވެ.
މިއަދަކީ ތަވާޟަޢުވެރިވެ އޯގާތެރިކަން އިސްކޮށް މާތް ﷲ ތަޢާލާ މިންވަރުކުރެއްވި އެތަކެއް ރަޙްމަތަށް ޝުކުރުވެރިވެ އެކަން ހަނދާން ކުރަންވީ ދުވަސް ކަމަށް ވެސް އެމަނިކުފާނުގެ ޕޯސްޓްގައި ވަނީ ފާހަގަކުރައްވާފައެވެ.
އޭގެއިތުރުން ޑރ ޖަމީލް ވަނީ މިއަދުވެސް ރައީސް ޑރ މުހައްމަދު މުޢިއްޒުގެ ޝުކުރުވެރިނުވުމާއި ރައީސް ޔާމީނާ މެދު ކަންތައް ކުރަމުންދާ ގޮތުން ދިވެހި އުންމަތަށް ލިބޭ އެތަކެއް ނުރަނގަޅު ފިލާވަޅުން މާތް ﷲ ތަޢާލާ ސަލާމަތްތެރިކަން މިންވަރު ކުރެއްވުމަށް އެދި ދުއާ ވެސް ދަންނަވާފައެވެ.
