މިއަހަރުގެ ފުރަތަމަ ކުއާޓަރުގައި މަސް ކުންފުނިތަކުން މަސް ގަނެފައިވާ އަދަދު 34 އިންސައްތަ ދަށްވެފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭއިން މިހެން ބުނެފައިވަނީ ކުއާޓަލީ އިކޮނޮމިކް ބުލެޓިންގައެވެ.
އެގޮތުން އެ ބުލެޓިންގައި ވާގޮތުން މަސްވެރިކަމުގެ ސިނާއަތް މިއަހަރު ވަނީ ވަރަށް ބޮޑަށް ދަށްވެފައެވެ.
އަހަރުގެ ފުރަތަމަ ކުއާޓަރުގައިވަނީ 21،941 ޓަނުގެ މަސް، މަސް ކުންފުނިތަކުން ގަނެފައެވެ.
މިއީ މިދިޔަ އަހަރުގެ ފުރަތަމަ ކުއާޓަރާއި އަޅާ ބަލާއިރު 34 އިންސައްތަ ދަށް އަދަދެއްކަން ފާހަގަކޮށްލެވެއެވެ.
މީގެ ތެރެއިން މިއަހަރު މިހާތަނަށް ކަޅުބިލަމަސް ގަނެފައިވާ މިންވަރު 33 އިންސައްތަ އަދި ކަންނެލި ގަނެފައިވާ މިންވަރު 36 އިންސައްތަ ވަނީ ދަށަށް ގޮސްފައެވެ.
ރައީސް ޑރ މުހައްމަދު މުއިއްޒުގެ ސަރުކާރު އައި ފަހުން މަސްވެރިކަން ދަށަށް ގޮސްފައިވާއިރު މަސްވެރިން ބާނާ މަސް ގަތުމަށްފަހު ފައިސާ ނުދޭ މައްސަލަ ވެސް ވަނީ އިންތިހާޔަށް ބޮޑުވެފައެވެ.
ފައިސާ ނުލިބި ގިނަ ދުވަސް ވާތީ ދާދި ފަހުން މަސްވެރިން ވަނީ ހުޅުމާލެ އަދި މާލެ އެއް ނަމްބަރު ޖެޓީ ކައިރީ އިހުތިޖާޖް ވެސްކޮށްފައެވެ.
އޭގެ ފަހުން މަސްވެރިންނަށް ދޭން ޖެހޭ 80 މިލިއަނުން 46 މިލިއަން ރުފިޔާ ވަނީ މިފްކޯއިން ދީފައެވެ. ނަމަވެސް ބާކީ ފައިސާ ދޭނެ ދުވަހެއް ސަރުކާރުން ހާމަކޮށްފައިނުވެއެވެ.
މަސްވެރިންނަށް 48 ގަޑިއިރު ތެރޭ ފައިސާ ދޭނެ ކަމުގެ ވައުދާއެކު އައި ސަރުކާރުން މިހާރު ބުނަމުން ދަނީ ވައުދު ނުފުއްދެނީ ރާއްޖޭގެ މާލީ ހާލަތު ދަށްވުމުންކަމަށެވެ.
