އާންމު ރައްޔިތުންނަށް ޓީޓީ ދޫކުރުން ހުއްޓާލުމަށްފަހު ބޮޑެތި ވިޔަފާރިތަކަށް ބޭންކް އޮފް މޯލްޑިވްސް އިން ޓެލެކްސް ޓްރާންސްފަރ (ޓީޓީ) ދޫކުރަން ފަށައިފިއެވެ.

މިކަމާ ގުޅިގެން ހަސަން ކުރުސީގެ ނަމުގައި ހިންގަމުންދާ އެކްސް އެކައުންޓުގައި ބުނެފައިވަނީ ބީއެމްއެލްއިން ބޮޑެތި ވިޔަފާރިތަކަށް ޓީޓީ ކުރެވޭ ގޮތަށް ހަދާފައިވާ ކަމަށާ، އާންމުންނަށް ޓީޓީ ނުކުރެވޭގޮތް ހެދީ އާންމުންގެ ނުފޫޒު ދަށްވުމުން ކަމަށެވެ.

ނަމަވެސް މިއީ ކަން ހިނގާ ގޮތާ ޚިލާފު ކަމެއްކަން ހާމަކޮށް އެ ޕޯސްޓުގައި އިތުރަށް ބުނެފައިވަނީ، މީގެ ކުރިން އަމިއްލަ ޔޫއެސް ޑޮލަރ އެކައުންޓެއް ހުރެއްޖެ ނަމަ ބީއެމްއެލް އެޕުން ދުވާލަކު 3000 ޑޮލަރާ ހަމައަަށް ފަސޭހައިން TT ކުރެވޭ ކަމަށެވެ.

ނަމަވެސް މިހާރު އެ ފީޗާރ ބީއެމްއެލުން ވަނީ ޑިސްއޭބްލް ކޮށްފައި ކަމަށާ ބޮޑެތި ވިޔަފާރިތަކަށް ނޯމަލް ޓީޓީ ކުރެވޭކަމަށް ވެސް އެ ޕޯސްޓުގައިވެއެވެ. މީގެ ސަބަބެއްގެ ގޮތުގައި ފާހަގަކޮށްފައިވަނީ އާންމުންނަކީ މާބޮޑޫ އާރެއް ބާރެއް ނެތް ބަޔަކަށްވެފައި ބޮޑެތި ވިޔަފާރިތަކުގެ ނުފޫޒު ގަދަވުން ކަމަށެވެ.

މިފަދަ ގޮތަކަށް ކުރުސީ ޕޯސްޓުކޮށްފައިވާއިރު، ރާއްޖެއިން ބޭރުގައި ކިޔަވާ ދަރިވަރުންގެ ޓިއުޝަން ފީއަށް ބޭންކުން ހަދާދެމުން ދިޔަ ޓީޓީ ތަކަށް ދޫކުރި ޑޮލަރުން ބޭންކު އޮފް މޯލްޑިވްސްއިން ދޫކުރުން ވެސް ހުއްޓާލާފައިވެއެވެ.

ބޭންކުން ޑޮލަރު ދޫކުރުން ހުއްޓާލުމުން، ބްލެކް މާކެޓްގައި ޑޮލަރުގެ ރޭޓު އިތުރަށް ބޮޑުވެގެން ދާނެ ކަމަށް ބެލެވެއެވެ. މުއިއްޒު ވެރިކަމަށް އައީ ޑޮލަރުގެ ބްލެކް މާކެޓް ހުއްޓުވާނެ ކަމަށް ބުނެއެވެ. ނަމަވެސް މިހާތަނަށް ޑޮލަރުގެ އަގު ހިފެހެއްޓުމަށް ސަރުކާރުން އެއްވެސް މަސައްކަތެއް ކޮށްފައި ނުވެއެވެ.

ވިޔަފާރިވެރިއަކު މައުލޫމާތު ދެމުން ހާމަ ކުރެއްވި ގޮތުގައި ޑޮލަރު އަގުބޮޑުކޮށް ބްލެކް މާކެޓުން ގަނެގެން މުދާ ގަންނަން ޖެހުމުން، އިތުރަށް މުދަލުގެ އަގު ބޮޑު ވެގެން ދާނެއެވެ. އަދި ޑޮލަރުގެ މައްސަލަ ކުރިއަށް ވުރެ މި ސަރުކާރު އައުމުން މިވީ ގޯސް ކަމަށް އޭނާ ހާމަ ކުރިއެވެ.