މަސް ގަންނަ ފަރާތާ ވިއްކާ ފަރާތާ ދެމެދު އެގްރިމަންޓެއް ހަދާ ގެއްލުމުގެ ބަދަލު ލިބޭނެ ނިޒާމެއް ގާއިމުކޮށްދިނުމަށް ސަރުކާރަށް ގޮވާލައިފިއެވެ.

ޒުވާން މަސްވެރިއަކު އެކްސްގައި ހިއްސާކޮށްފައި ވީޑިއޯއެއެްގައި ވަނީ ހިތްދަތި އެތައް ވާހަކަތަކާއެކު ސަރުކާރަށް މެސެޖެއް ދީފައެވެ.

އެގޮތުން އެ ވީޑިއޯގައި މަސްވެރިޔާ ބުނެފައިވަނީ މަސްވެރިންނަކީ ވެސް އެހެން ރައްޔިތުންނެކޭ އެއްފަދައިން ދިވެހި ރައްޔިތުން ކަމަށާ އަމިއްލަ ޒިންމާތައް ކޮންމެ މަސްވެރިއެއްގެ ވެސް އޮންނަ ކަމަށެވެ.

އެހެންކަމުން ލިބެން ޖެހޭ ފައިސާ ލިބިގެން މެނުވީ ޒަރޫރީ ބޭނުންތައް ނުފުއްދޭނެ ކަމަށާ ދެ މސް ދުވަސް ވެގެން ދާއިރު މިހާރު މަސްވެރިން ތިބީ ދަރަނިވެރިވެ ގޮތް ހުސްވެފައިކަމަށެވެ.

ގޭގެ ބިލުތަކާ ދަރިންގެ ކިޔެވުމުގެ ޚަރަދުވެސް ގާތް މީހުން އަތުން ދަރަންޏަށް ފައިސާ ނަގައިގެން ދެކޮޅު ޖައްސަން ޖެހިފައިވާއިރު މިއީ ހައްގު މިންވަރު ނޫން ކަމަށް ވެސް އެ މަސްވެރިޔާ ހިއްސާކޮށްފައިވެއެވެ.

މަސްވެރިޔާ ވަނީ ދިވެހި ސަރުކާރުންތަކުން ކޮންޓްރޯލުކުރަމުން އަންނަ ސިނާއަތަކަށް މަސްވެރި ސިނާއަތްވާއިރު މިހާ ދަށް ހާލަތެއްގައި އެ ސިނާއަތް އޮންނަން ޖެހޭ ސަބަބާ މެދު ސުވާލު އުފައްދާފައެވެ.

މަސްވެރިޔާ ވަނީ މިފްކޯއަށާ ކޫއްޑުގައި ހުންނަ މަސް ފެކްޓަރީގައި މީގެ ކުރިން ވެރިންގެ ގޮތުގައި ތިބި ފަރާތްތަކަށްވެސް އަމާޒުވަމުން ދާ ތުހުމަތުތަކަށް ޖަވާބުދާރީވުމަށް ގޮވާލާފައެވެ.

މީގެ އިތުރުން މަސްވެރިޔާ ވަނީ މިހާރު މަސްވެރިކަން މިއޮތް ހާލަތަށް ވެއްޓެން ޖެހުނު ސަބަބު ހޯދާ ބަލާ އަޅަން ޖެހޭ ފިޔަވަޅުތައް އެޅުމަށް ރައީސް މުއިއްޒަށް ގޮވާލާފައެވެ.

އެގޮތުން އެ މަސްވެރިޔާ ވަނީ މިހާރު މިއޮތް ހާލަތުން އިބްރަތް ހާސިލްކޮށް ކުރިއަށް އޮތްތަނުގައި މަސްވެރިންނަށް ފައިނޭޝިއަލް ސެކިއުރިޓިއެއް ގާއިމުކޮށްދޭން ޖެހޭ ކަމަށް ބުނެފައެވެ.