މާފަންނު ގެސްޓް ހައުސް އެއްގައި ނޭޕާލު މީހަކު ރަހީނު ކޮށްގެން އުޅުނު މައްސަލައިގައި ހައްޔަރު ކުރި މީހާގެ ބަންދަށް އަނެއްކާވެސް މުއްދަތު އިތުރުކޮށްފިއެވެ.

ނޭޕާލްގެ ފިރިހެނަކު ރަހީނުކުރި މައްސަލައިގައި "އިސްކޮށް" އުޅުނު ކަމަށް ބުނާ ބަންގްލަދޭޝް މީހާ އިތުރު 15 ދުވަހަށް ބަންދު ކުރަން ކުރިމިނަލް ކޯޓުން އަމުރުކުރީ އޭނާއަށް ކުރިން ޖެހި މުއްދަތު ހަމަވެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުންނެވެ.

އިއްޔެ ކޯޓުން ވަނީ މި މައްސަލައިގައި ހިމެނޭ 35 އަހަރުގެ ޝަމީމް މިއާ ކިޔާ ބަންގްލަދޭޝް މީހާގެ ބަންދު އިތުރުކޮށްފަ އެވެ. އޭނާ ވަނީ ކުރިން ވެސް ތުހުމަތުތަކަށް އިންކާރުކޮށްފަ އެވެ.

ކޯޓު އަމުރުން އެނގޭ ގޮތުގައި އޭނާ އަކީ "ބާ ޓެންޑާ" އެއްގެ ވަޒީފާ އަދާ ކުރުމަށް ރާއްޖެ އައި މީހެއް ކަމެވެ. ނަމަވެސް އޭނާ ރާއްޖޭގައި ކުރަނީ ހުއްދަ ދީފައިވާ މަސައްކަތެއް ނޫން ކަން ފާހަގަކޮށްފައިވެއެވެ. އޭނާ ރާއްޖެ އައިސް އުޅުނީ ގެސްޓްހައުސް އެއްގައި މަސައްކަތް ކުރުމަށެވެ.

އަމުރުގައި ބުނެފައި ވަނީ އޭނާ ރާއްޖޭގައި މަސައްކަތް ކުރަން ސްޕޮންސާ ދިނީ ކާކުކަން ވެސް އެނގެން ނެތް ކަމަށެވެ.

ޝަމީމް މިއާ އިތުރު 15 ދުވަހަށް ބަންދު ކުރަން އިއްޔެ ނެރުނު ކޯޓު އަމުރުގައި ބަޔާންކޮށްފައި ވަނީ އޭނާ ކޮށްފައިވާ އަމަލުގައި އަނިޔާވެރިކަން ފެންނަ ކަމަށެވެ. އަދި ގަވާއިދާ ހިލާފަށް ރާއްޖޭގައި އުޅޭ މީހަކަށް ވެފައި، ފިލައިފާނެ ކަމުގެ އިހުތިމާލު ވެސް އޮތް ކަމަށެވެ.

އޭނާ ކުރިން ބުނެފައި ވަނީ އޭނާ މަސައްކަތް ކުރާ ގެސްޓްހައުސްގައި މީހަކު ރަހީނުކޮށްގެން ގެންގުޅޭކަން ނޭންގޭ ކަމަށެވެ. މީގެ ކުރިން އޭނާގެ މައްޗަށް ނެރުނު ކޯޓު އަމުރުގައި ބަޔާންކޮށްފައި ވަނީ، ސީނުގައި ތިބި ފުލުހުން ސުވާލު ކުރުމުން އޭނާ ދީފައިވާ ޖަވާބުން، އެ މީހާ ބަންދުކޮށްފައި ހުރިކަން އޭނާއަށް އެނގޭކަން ހާމަވެފައިވާ ކަމަށެވެ.

ވީބީ މާޓް ގޯޅި ތެރޭގައި ހުރި "ސްކައި ލޭންޑް" ނަމަކަށް ކިޔާ، ގެސްޓް ހައުސްގައި ނޭޕާލްއަށް ނިސްބަތްވާ ފިރިހެނެއް ގެންގުޅެމުން ގެންދާތާ ހަފްތާއެއް ވެފައި ވަނިކޮށް ފުލުހުންގެ އެންޓި ހިއުމަން ޓްރެފިކިން ޑިޕާޓްމަންޓުގެ ސަމާލުކަމަސް އައިސް އެމީހާ ސަލާމަތްކޮށްފައިވަނީ މެއި މަހުގެ 24 ވަނަ ދުވަހުއެވެ.

ނޭޕާލް މީހާއާ އޭނާ ބަންދުކޮށްގެން ގެންގުޅުނު މީހުންނާމެދު ޖެހުނީ ފައިސާގެ މައްސަލަތަކެއް ކަމަށް ފުލުހުން ކުރީން ބުނެފައިވެ އެވެ. މި މައްސަލަ ފުލުހުން ދަނީ ތަހުގީގު ކުރަމުންނެވެ