މާލޭ ސަރަހައްދުގައި ގާއިމުކުރާ ބައިނަލްއަގްވާމީ ޕޯޓު ވިއްކާލަން ނިންމާފައިވާކަން ހާމަވާ ސިޓީއެއް އާންމުވެއްޖެއެވެ.

ސިޓި އާންމުކޮށްފައިވަނީ ހަސަން ކުރުސީގެ ނަމުގައި ހިންގަމުން ގެންދާ އެކްސް އެކައުންޓުންނެވެ. އެ ޕޯސްޓުގައި ބުނެފައިވާ ގޮތުގައި އެމްޕީއެލުން ހިންގަން ނިންމާފައިވާ އެ ޖަރީމާއާ ދެކޮޅަށް މުޅި ގައުމުގައި އިހުތިޖާޖުކޮށް އަޑު އުފުލަން ޖެހެއެވެ.

އާންމުވެފައިވާ ސިޓީއަކީ ރައީސުލްޖުހޫރިއްޔާގެ އޮފީހުގެ އިކޮނޮމިކު ކައުންސިލުން މޯލްޑިވްސް ޕޯރޓްސް ލިމިޓެޑް(އެމްޕީއެލް)ގެ ސިއީއޯ މުހައްމަދު ވަޖީހަށް އެޑްރެސްކޮށް ފޮނުވާފައިވާ ސިޓިއެކެވެ.

އެ ސިޓީގައި ބަޔާންކޮށްފައިވަނީ ތިލަފުށީ ޕޯޓު ވިއްކާލުމާ ގުޅުން ހުރި މުއަމަލާތްތަކުގެ ވާހަކައެވެ. ތިލަފުށީ ޕޯޓު ތަރައްގީކުރުމާ ގުޅޭ ގޮތުން 27 މާރިޗު 2024ގައި ބޭއްވި އިކޮނޮމިކު ކައުންސިލްގެ ބައްދަލުވުމުގައި ނިންމި ގޮތް އެ ސިޓީގައި ހާމަކޮށްފައިވެއެވެ.

އެގޮތުން ތިލަފުށީގައި ޕޯޓު ތަރައްގީކުރުމުގެ މަސައްކަތްކުރުމަށް ޝައުގުވެރިކަން ފާޅުކޮށްފައިވަނި ދެ ފަރާތަކުން ކަމަށާ އެ ދެފާރަތަކީ (Dubai World Ports (DWP އާ International Container Terminal Services, Inc )ICTSI އާ ކަމަށެވެ.

ޕްރޮޕޯސަލް ދިރާސާކުރުމަށް ފަހު ICTSI ގެ ހުށަހެޅުން ރަގަޅު ކަމަށް ފެންނާތީ އެ ކުންފުންޏާ އެކު ފަހުމު ނާމާއެއްގައި ސޮއިކުރުމަށް އެ ކައުންސިލުގެ އިއުތިރާޒެއް ނެތް ކަމަށް ވެސް ސިޓީގައި ބަޔާންކޮށްފައިވެއެވެ. އަދި ވީ އެންމެ އަވަހަކަށް އިންތިޒާމުތައް ހަމަޖއްސާ ނިންމެވުމަށް ވެސް ސިޓީގައި ބުނެފައިވެއެވެ.

މިފަދަ ސިޓިއެއް އާންމުވެފައިވާއިރު ހަސަން ކުރުސީ ހާމަކޮށްފަިއވާ ގޮތުގައި ޖޫން މަހުގެ 28 ވަނަ ދުވަހުގެ ނިޔަލަށް މިކަމުގެ މުއްދަތު ހަމަވާތީ އެއަށް ވުރެ ކުރިން މިކަން ނިންމަން ދިވެހި ސަރުކާރުން ގެންދަނީ މަސައްކަތްކުރަމުންނެވެ.

ކުރުސީ ތުހުމަތު ކުރާ ގޮތުގައި ICTSI އަށް ޕޯޓު ދޫކޮށްލުމަށް އެއްބަސްވުމަށް އިކޮނޮމިކު ކައުންސިލްގެ ބައެއް މެމްބަރުން ރިޝްވަތުވެސް ނަގާފައިވެއެވެ. އަދި މިކަން ސިފަކޮށްފައިވަނި ރޯމާ ދުވާލު ހިންގަން އުޅޭ ބޮޑު ޖަރީމާއެއްގެ ގޮތުގައެވެ.

ސިޓީގެ ސައްހަކަން ކަށަވަރުކުރުމަށް ތޭރަ އޮންލައިން އިން ރައީސް އޮފީހުގެ އިސް ތަރުޖަމާނު ހީނާ ވަލީދަށް މެސެޖު ކުރުމުން ވަކި ޖަވާބެއް ދެއްވަފައިނުވެއެވެ.

މާލެ ސަރަހައްދުގެ ޕޯޓު 99 ވަރަކަށް އަހަރަށް ދޫކޮށްލަން އުޅޭތީ މީގެ ކުރިން ރައީސް އަބްދުﷲ ޔާމީން ކަންބޮޑުވުން ފާޅުކުރައްވާފައިވެއެވެ. އެގޮތުން އޭގެން ލިބޭ ފައިސާއަށް ވުރެ ދިވެހިން އަމިއްލައަށް ތަން ތަރައްގީކުރުމުން ލިބޭ ފައިދާ ބޮޑުވެފައި އެކަމަކީ ދިވެހިންނަށް އަމިއްލަ ކުރެވޭނެ ވަރު ކަމެއް ކަމަށް އެމަނިކުފަނު ވިދާޅުވިއެވެ. އަދި ރައީސް ޔާމީން ވިދާޅުވީ ކިރިޔާ އިގްތިސޯދުގެ ކުޑަ މިންވަރެއް އެނގޭ މީހަކު ނަމަވެސް އެކަން އެ ގޮތަށް ނުކުރާނެ ކަމަށާ މާލެ ޕޯޓު ވިއްކާލައިގެން ހިންގަން އުޅެނީ އިގްތިސޯދީ ބޮޑު ޖަރީމާ އެއް ކަމަށެވެ.