އިންޑިޔާއިން ރާއްޖެ އަންނަ ފަތުރުވެރިންގެ އަދަދު މަދުވެފައިވާތީ މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް (އެމްއެމްޕީއާރުސީ) އާއި މަންތާ އެއާރ ގުޅިގެން އިންޑިއާގެ ބެންގަލޫރުގައި "އެކްސްޕްލޯ މޯލްޑިވްސް ރޯޑްޝޯ" ގެ ނަމުގައި އިވެންޓެއް ބާއްވަން ނިންމައިފި އެވެ.

މިކަން ހާމަކޮށްފައިވަނީ އެމްއެމްޕީއާރްސީ އިން މީޑިޔާ ގްރޫޕަށް ފޮނުވި ނޫސް ބަޔާނެއްގައެވެ.

އެގޮތުން އެ ބަޔާނުގައި އެމްއެމްޕީއާރްސީގެ މެނޭޖިންގ ޑިރެކްޓާރ އިބްރާހިމް ޝިއުރީ ވިދާޅުވެފައި ވަނީ އިންޑިއާ މާކެޓަކީ ދިވެހި ފަތުރުވެރިކަމަށް ވަރަށް މުހިންމު މާކެޓެއް ކަމަށެވެ.

އެމްއެމްޕީއާރުސީން ބުނިގޮތުގައި މި ރޯޑްޝޯ ކުރިޔަށްދާނީ ބެންގަލޫރުގެ ޝަންގްރިއްލާ ހޮޓެލްގައެވެ.

އަދި މި ރޯޑްޝޯގެ ބޭނުމަކީ ރާއްޖެ އަންނަ އިންޑިޔާގެ ފަތުރުވެރިންގެ އަދަދު އިތުރު ކުރުން ކަމަށް ވެސް އެމްއެމްޕީއާރްސީ އިން ވަނީ ބުނެފައެވެ.

އިންޑިޔާގެ ލަކްޝަދީޕް ޕްރޮމޯޓްކޮށް އެ ގައުމުގެ ޕްރައިމް މިނިސްޓާރ ނަރެންދްރާ މޯދީ ސޯޝަލް މީޑިޔާގައި ވީޑިޔޯ އެއް އާންމު ކުރުމުން ރާއްޖޭގެ ތިން ނައިބު ވަޒީރަކު ވަނީ މޯދީ އަށް ފުރައްސާރަކޮށްފައެވެ. މި މައްސަލައިގައި އިންޑިޔާ އިން ވަނީ "ބޮއިކޮޓް މޯލްޑިވްސް" ގެ ނަމުގައި ކެމްޕެއިން އެއް ވެސް ކުރިޔަށް ގެންގޮސްފައެވެ.

އޭގެ ސަބަބުން އެ ގައުމުގެ ފަތުރުވެރިން ރާއްޖެ އައުން ވަނީ މަޑު ޖެހިފައެވެ.