މާލޭ ސަރަހައްދުގައި ގާއިމުކުރާ ބައިނަލްއަގްވާމީ ޕޯޓު ތަރައްގީކުރުމަށް އިންޓަރނޭޝަނަލް ކޮންޓެއިނަރ ޓާރމިނަލް ސާވިސަސް، އިންކް (އައިސީޓީއެސް)އާ އެކު ވެވޭ ފަހުމު ނާމާ ބާތިލުކުރިޔަސް 50 މިލިއަން ޑޮލަރު ދައްކަން ޖެހޭކަން ހާމަވެއްޖެއެވެ.

މާލޭ ސަރަހައްދުގައި ގާއިމުކުރާ ބައިނަލްއަގްވާމީ ޕޯޓު ވިއްކާލަން ނިންމާފައިވާކަން ހާމަވާ ސިޓީއެއް ވަނީ އާންމުވެފައެވެ.

ރައީސް އޮފީހުގެ އިކޮނޮމިކު ކައުންސިލްގެ ފަރާތުން އެ އޮފީހުގެ ޕްރިސިޕަލް ސެކެރެޓަރީ ޓު ދަ ޕްރެޒިޑެންޓް މުހައްމަދު ޝާހިދު ސޮއިކުރައްވާ ފޮނުވާފައިވާ އެ ސިޓީގައި ބުނެފައިވާ ގޮތުގައި، ތިލަފުށީ ޕޯޓު ވިއްކާލުމާ ގުޅުން ހުރި މުއަމަލާތްތަކުގެ ވާހަކައެވެ. ތިލަފުށީ ޕޯޓު ތަރައްގީކުރުމާ ގުޅޭ ގޮތުން 27 މާރިޗު 2024ގައި ބޭއްވި އިކޮނޮމިކު ކައުންސިލްގެ ބައްދަލުވުމުގައި ނިންމި ގޮތް އެ ސިޓީގައި ހާމަކޮށްފައިވެއެވެ.

އެގޮތުން ތިލަފުށީގައި ޕޯޓު ތަރައްގީކުރުމުގެ މަސައްކަތްކުރުމަށް ޝައުގުވެރިކަން ފާޅުކޮށްފައިވަނި ދެ ފަރާތަކުން ކަމަށާ އެ ދެފާރަތަކީ (Dubai World Ports (DWP އާ International Container Terminal Services, Inc )ICTSI އާ ކަމަށެވެ.

ޕްރޮޕޯސަލް ދިރާސާކުރުމަށް ފަހު ICTSI ގެ ހުށަހެޅުން ރަގަޅު ކަމަށް ފެންނާތީ އެ ކުންފުންޏާ އެކު ފަހުމު ނާމާއެއްގައި ސޮއިކުރުމަށް އެ ކައުންސިލުގެ އިއުތިރާޒެއް ނެތް ކަމަށް ވެސް ސިޓީގައި ބަޔާންކޮށްފައިވެއެވެ. އަދި ވީ އެންމެ އަވަހަކަށް އިންތިޒާމުތައް ހަމަޖއްސާ ނިންމެވުމަށް ވެސް ސިޓީގައި ބުނެފައިވެއެވެ.

މިކަން އާންމުވެފައިވަނިކޮށް މިއަދުގެ ވަގުތެއްގައި ވަނީ އެ ބުނާ ފަހުމު ނާމާގެ ކޮޕީއެއްވެސް އާންމުވެފައެވެ. އެ ކޮޕީއިން ހާމަވާ ގޮތުގައި އެމްޕީއެލްއަށް އެއަށް ވުރެ މޮޅު އަދި ފައިދާ ކުރުވަނިގޮތެއް ފެނިގެން ނަމަވެސް ފަހުމު ނާމާ ބާތިލުކުރާ ކަމުގައިވަނި ނަމަ އައިސީޓީއެސްއައިއަށް ބަދަލެއްގެ ގޮތުގައި 50 މިލިއަން ޑޮލަރު ދޭން ޖެހޭނެއެވެ. އަދި މީގެ އިތުރުން އައިސީޓީއެސްއައި އިން ރާއްޖެއަށް އެއްވެސް ޓެކްސް އެއްވެސް ދައްކަން ނުޖެހޭނެކަމަށް ފަހުމު ނާމާގައިވެއެވެ.

މި ފަހުމު ނާމާގައި ސޮއިކުރުން މި މަހުގެ 28 ވަނަ ދުވަހު އޮންނާނެކަމަށް މައުލޫމާތު ލިބިފައިވާއިރު، ޕޯޓު ދޫކޮށްލުމަށް އެއްބަސްވުމަށް އިކޮނޮމިކު ކައުންސިލްގެ ބައެއް މެމްބަރުން ރިޝްވަތުވެސް ނަގާފައިވެއެވެ. އަދި މިކަން ސިފަކޮށްފައިވަނި ރޯމާ ދުވާލު ހިންގަން އުޅޭ ބޮޑު ޖަރީމާއެއްގެ ގޮތުގައެވެ.

މާލެ ސަރަހައްދުގެ ޕޯޓު 99 ވަރަކަށް އަހަރަށް ދޫކޮށްލަން އުޅޭތީ މީގެ ކުރިން ރައީސް އަބްދުﷲ ޔާމީން ކަންބޮޑުވުން ފާޅުކުރައްވާފައިވެއެވެ. އެގޮތުން އޭގެން ލިބޭ ފައިސާއަށް ވުރެ ދިވެހިން އަމިއްލައަށް ތަން ތަރައްގީކުރުމުން ލިބޭ ފައިދާ ބޮޑުވެފައި އެކަމަކީ ދިވެހިންނަށް އަމިއްލަ ކުރެވޭނެ ވަރު ކަމެއް ކަމަށް އެމަނިކުފަނު ވިދާޅުވިއެވެ. އަދި ރައީސް ޔާމީން ވިދާޅުވީ ކިރިޔާ އިގްތިސޯދުގެ ކުޑަ މިންވަރެއް އެނގޭ މީހަކު ނަމަވެސް އެކަން އެ ގޮތަށް ނުކުރާނެ ކަމަށާ މާލެ ޕޯޓު ވިއްކާލައިގެން ހިންގަން އުޅެނީ އިގްތިސޯދީ ބޮޑު ޖަރީމާ އެއް ކަމަށެވެ.