މިފްކޯއިން މަސްވެރިންނަށް ދޭންޖެހޭ ފައިސާ ނުދޭތީ އައްޑޫ ސިޓީ ހުޅުމީދޫ މިފްކޯ ފިޝިންގް ކޮމްޕްލެކްސްގައި މަސްވެރިން މިއަދު ވެސް މުޒާހަރާކުރަން ފަށައިފިއެވެ.

"ތޭރަ އޮންލައިން" އަށް މައުލޫމާތު ލިބުނުގޮތުގައި މަސްވެރިން އައްޑޫގައި މުޒާހަރާ ކުރަން ފަށާފައި ވަނީ އިއްޔެ ހަވީރުން ފެށިގެންނެވެ.

މުޒާހަރާގެ ބައިވެރިން ގޮވާލަމުން ދަނީ މަސްވެރިންނަށް ދޭންޖެހޭ ފައިސާ ވަގުތުން ވަގުތަށް ދިނުމަށެވެ.

އަދި ކުރިއަށް އޮތް ތަނުގައި ކިރުވާ މަހަށް ކޮންމެ 15 ދުވަހަކުން ފައިސާ ދިނުމަށް ސަރުކާރުން އެއްބަސްވުމަށެވެ.

މަސްވެރިންނާ މިކަމާ ބެހޭގޮތުން ވާހަކަ ދައްކަން ކަމާގުޅޭ އިސް ފަންތީގެ ބޭފުޅަކު މުޒާހަރާގެ ބައިވެރިންގެ ގާތަށް ވަޑައިގަތުމަށް ވެސް އެ ބައިވެރިން ވަނީ ގޮވާލާފައެވެ.

މަސްވެރިންގެ ހައްގުގައި ވަކާލާތު ކުރި އަދުގެ މަސްވެރިކަމާ ބެހޭ ވަޒީރު އަހުމަދު ޝިޔާމް މަސްވެރިންނަށް ސީދާ ޖަވާބެއް ނުދެއްވާތީ ވެސް މަސްވެރިން އަންނަނީ ކަންބޮޑުވުން ފާޅުކުރަމުންނެވެ.

މަސްވެރިންނަށް ފައިސާ ނުދީގެން މި މަހު ރާއްޖޭގެ އެކި ހިސާބުތަކުގައި މަސްވެރިން ވަނީ އިހުތިޖާޖް ކޮށްފައެވެ.

އެގޮތުން މާލޭ އަދި ހުޅުމާލޭގައި އާއި ގދ މަޑަވެލީގައި ވެސް މަސްވެރިން ވަނީ ފައިސާ އަވަހަށް ދިނުމަށް ގޮވާލާ އިހުތިޖާޖްކޮށްފައެވެ.

އޭގެފަހުން ސަރުކާރުން ވަނީ މަސްވެރިންނަށް ދޭން ޖެހޭ 80 މިލިއަންގެ ރުފިޔާ ތެރެއިން 46 މިލިއަން ފޯރުކޮށްދީފައެވެ. ނަމަވެސް ބާކީ ފައިސާ ދޭނެ ދުވަހެއް ވެސް ބުނެފައި ނުވާތީ މަސްވެރިން އަންނަނީ ފައިސާ އަވަސް މުއްދަތެއްގައި ދިނުމަށް ގޮވާލާމުންނެވެ.