

ނިމިދިޔަ ސަރުކާރެކޭ އެއްފަދައިިން މި ސަރުކާރުން މަސްވެރިންނަށް އިހުމާލުވަމުންދާ ވާހަކަ އަކީ އެއްވެސް ވަރަކަށް އައު ވާހަކައަކަށް ނުވާނެއެވެ. ރައީސް ޑރ މުހައްމަދު މުއިއްޒުގެ ސަރުކާރަކީ މަސްވެރިންނަށް ފާގަތި ދުވަސްތަކެއް މިންވަރުކޮށްދިނުމުގެ ވައުދާއެކު އައި ސަރުކާރެއް ކަމީ އެއްވެސް ޝައްކެއް އޮތް ކަމެއް ނޫނެވެ. ރިޔާސީ އިންތިޚާބްގެ ކެމްޕެއިން ދުވަސްވަރު ބޮޑެތި ވައުދުތައް ވަމުން ގެންދެވި އިރު ފާހަގަކޮށްލެވޭގޮތުގައި އެންމެ ބޮޑެތި އަދި އެންމެ ގިނަ ވައުދުތައް ވެފައިވެސް ވަނީ މަސްވެރިންނަށެވެ.
އެގޮތުން އެމަނިކުފާނު މަސްވެރިންނަށް ވީ ވައުދުތަކަށް އަލިއަޅުވާލާއިރު، މަސް ބާނާއިގެން މަސް ކިރާތާ 48 ގަޑިއިރު ތެރޭގައި ފައިސާ ދިނުމާއި، މަސްވެރިން ބާނާ ކަޅުބިލަ މަސް 80-100 އާ ދެމެދުގައި މިފްކޯއަށް ގަތުމާއި މަސްވެރިންނަށް ހާއްސަ އިނާޔަތެއް ދިނުން ހިމެނެއެވެ. މީގެއިތުރުންވެސް އައިސް ލިބޭނެ ގޮތްތައް މެދުވެރިކޮށްދިނުމަށް ރާއްޖޭގެ އެކި ހިސާބުތަކުގައި އައިސް ޕްލާންޓްތައް ހެދުން ވެސް ހިމެނެއެވެ.
މި ވައުދުތައް މަސްވެރިންނަށް ވީ ހަމައެކަނި ރައީސް މުއިއްޒެއެް ނޫނެވެ. އަދުގެ މަސްވެރިކަމާ ބެހޭ ވުޒާރާގެ ވަޒީރު އަހުމަދު ޝިޔާމް ވެސް މި ވައުދުތައް ތަކުރާރުކުރެއްވިއެވެ. މަސްވެރި އާއިލާއަކަށް ނިސްބަތްވާ ޝިޔާމަކީ މަސްވެރިންނަށް އަބަދުވެސް ހެޔޮއެދުނު ބޭފުޅެކެވެ. ވަޒީރު ކަމަށް އައުމުގެ ކުރިން މަޖިލިސްގައި މެެމްބަރުކަން ކުރެއްވި އިރުވެސް ޝިޔާމް ވަނީ އެތައް ފަހަރެއްގެ މަތިން މަސްވެރިންގެ ހައްގުގައި ވަކާލާތުކޮށްފައެވެ. އެހެންކަމުން ޝިޔާމްގެ ވަޒީރުކަމުގައި މިއަދު މަސްވެރިން މިހާ ނިކަމެތި ހާލު ޖެހިގެން ތިބެފާނެއޭ ބުނާނީ ކާކުހެއްޔެވެ؟
"މަސްވެރިންނަށް ފައިސާ ނުދީ ޗަ ތި ހަދަނީ ކޯއްޗެއް؟" ހޭ މިނިސްޓާރ ޝިޔާމް ކުރީގެ މަސްވެރިކަމާ ބެހޭ ވުޒާރާގެ ވަޒީރަށް މަޖިލިސް ގައި އިންނަވާ ވިދާޅުވި އަޑު އަދިވެސް މަސްވެރިންގެ ކަންފަތުގައި ގުގުމާލައެވެ. އޭރު މިނިސްޓާރ ޝިޔާމް ވިދާޅުވި ގޮތައް މިއަދު މަސްވެރިން އެބަ ކިޔައެވެ.
ސަބަބެއް ވެސް ނެތި ނޫނެވެ. ސަރުކާރަށް 7 މަސް ވެގެން ދިޔަ އިރު ރާއްޖޭގެ އެކި ކަންކޮޅުތަކުގައި ފައިސާ ނުލިބިގެން މަސްވެރިން މުޒާހަރާކޮށްފިއެވެ. 7 މަސްތެރޭ ކިތައް މުޒާހަރާ ކަމެއް ބުނެދޭން ވެސް އުނދަގުލެވެ. އެހެންނަމަވެސް ފާހަގަކޮށްލެވޭ ދެތިން މުޒާހަރާއެއް ވެެއެވެ. ކޫއްޑޫގައި މަސްވެރިން ކުރި މުޒާހަރާ، ގދ މަޑަވެލި މުޒާހަރާ، ހުޅުމާލެ އަދި މާލެ 1 ނަމްބަރު ޖެޓީ މުޒާހަރާ އަދި ދާދި ފަހުން އައްޑޫ ސިޓީގައި ވެސް މަސްވެރިން ވަނީ ފައިސާ ނުލިބޭތީ ކަންބޮޑުވުން ފާޅުކޮށް މުޒާހަރާކޮށްފައެވެ.
މުޒާހަރާ ކުރަނީ އެއްވެސް ސިޔާސީ ބޭނުމެއް އޮވެގެން ނޫންކަމަށާއި މަސްވެރިން މުޒާހަރާއަށް ނިކުންނަށް މަޖުބޫރުކުރުވީ ހުދު ސަރުކާރުކަމަށް ވެސް މަސްވެރިން ބުނެއެވެ. މަސްވެރިންނަށް ހައްގު ފައިސާ ނުލިބި އެހާ ނިކަމެތި ހާލެއް ޖައްސާފައި މިނިސްޓާރ ޝިޔާމް ފިނި ކޮޓަރީގައި މިއަދު އިންނަވާތީ ވެސް ހައިރާންވެއެވެ. ކޮބައިތޯ އޭރުގައި ޝިޔާމް ވިދާޅުވި ވާހަކަތައް؟ ބަހާ އަމަލާ ދިމާނުވި ސަބަބު އެނގެން މަސްވެރިން ވެސް ތިބީ އިންތިޒާރުގައެވެ.
މިއަދު ކަރަންޓް ބިލް އެހާ އަގުބޮޑުކޮށްފައި، އެ ބިލަށް ދައްކާނެ ފައިސާއެއް ވެސް ނެތީ މަސްވެރިންގެ އަތުގައެވެ. ރާއްޖޭގެ އެންމެ ބޮޑު ސިނާއަތް މިއަދު ދަށަށް ގޮސްފައި އެވަނީ ސަރުކާރުގެ ސަބަބުންނެވެ. މިކަން އެމްއެމްއޭގެ ތަފާސް ހިސާބުތަކުން ސާފެވެ. ކޮންމެ ދުވަހަކު މަސްވެރިން މި ޖެހެނީ ފައިސާ ހޯދުމަށް ސަލާން ޖަހާށެވެ. މަސްވެރިންގެ އަޑުތައް އަހާލާނެ ވެރިޔަކު ނެތެވެ. މަސްވެރިންގެ ވޯޓު ހޯދައިގެން ވެރިކަމަށް އައުމަށްފަހު މިހާބޮޑު ދޯކާއެއް ދޭން ސަރުކާރުން ފަސްނުޖެހުނުކަމެވެ. ޢީދު ތެރޭގައި ކުރިއަށް ގެންދިޔަ މަށި މާލި ޕެރޭޑުގައި "މަސް ބުހުތާނަށް ކިރާ މަހުގެ ރުފިޔާ ދެވޭނީ 48 ދަރިން ވިހާ ފަހުން" މިހެން ވެސް ޖަހަން ޖެހުނީ ސަރުކާރުގެ ދޯހަޅި ސިޔާސަތުތަކާއި، ދެކޮޅު ނުޖެހޭ ވާހަކަތަކުގެ ސަބަބުންނެވެ.
މަސްވެރިން ސަރުކާާރާާ ދެކޮޅަށް ނިކުމެ މުޒާހަރާކުރުމުން، ސަރުކާރުން ބުނަނީ ދައުލަތުގެ މާލީ ޙާލަތު ރަނގަޅު ނުވާ ކަމަށެވެ. މަސްވެރިންނަށް ވެފައިވާ ވައުދުތައް ފުއްދޭނީ ދައުލަތުގެ މާލީ ޙާލަތު ރަނގަޅު ވުމުން ކަމަށެވެ.
ސަރުކާރުގެ ވާހަކަތަކެއް ހަމައެއްނުޖެހެއެވެ. ސިޔާސީ މުވައްޒަފުން ނެގުމަށް ސަރުކާރުގައި މާލީ ތަނަވަސްކަން ހުރެއެވެ. ރައްޔިތުންގެ ފައިސާއިން ޔޫރޯ މުބާރާތް ދެއްކުމަށް ކުންފުނިތަކުން ސްޕޮންސާ ދޭންވީމާ، ކުންފުނިތަކުގައި ވެސް ފައސާ ހުރެއެވެ. އަނެއްހެން ބުނާނަމަ، ސަރުކާރުން ބޭނުންވާ ކަންކަން ކުރަންވީމަ ފައިސާ ހުރެއެވެ. މަސްވެރިންނަށް ފައިސާ ދޭންވީމާ ސަރުކާރުގެ މަލީ ހާލަތު ގޯސްވަނީ ހިޔަންޏަށް ހިޔަނި ވެސް އޮޅޭހެންނެވެ.