ވެރިކަންކުރާ ޕާޓީ ޕީއެންއެސީއިން މަސްވެރިންނަށް ދޭން ޖެހޭ ފައިސާ ނުދީ އެ ޕާޓީގެ އައު ޖަގަހައެއް ހުޅުވުން ޕީއެންއެފްގެ ސެކެޓްރީ ޖެނެރަލް މުހައްމަދު މަލީހު ޖަމާލު ކުށްވެރިކޮށްފިއެވެ.

އެކްސްގައި ކުރެއްވި ޕޯސްޓެއްގައި މަލީހު ވިދާޅުވީ ރައީސް ޑރ މުހައްމަދު މުއިއްޒު މިފަދައިން މަސްވެރިންގެ ފައިސާ ނުދެއްވާ އެމްޑީޕީގެ ކުރީގެ ޖަގަހައިގައި އެ ޕާޓީގެ އައު ޖަގަހަ ހުޅުވުމަކީ ލަދުވެތި ކަމެއް ކަމަށެވެ.

ޕީއެންސީއިން އަންނަނީ ކުރީގައި އެމްޑީޕީއިން އެ ޕާޓީގެ ހަރުގޭގެ ގޮތުގައި ބޭނުންކުރަމުން އައި ބިމުގައި އެ ޕާޓީގެ އައު ޖަގަހަ ހޮނިހިރު ދުވަހުގެ ރޭ ހުޅުވުމަށް ތައްޔާރު ވަމުންނެވެ.

މިކަމާއި ގުޅިގެން މަލީހު ވިދާޅުވީ، ޕީއެންސީ ޖަގަހަ އެމްޑީޕީ ޖަގަހަ ހުރިތާ ހުޅުވުމުގެ މަގްސަދަކީ، މި ސަރުކާރުގެ ވައްކަންތައް ދިފާޢުކޮށް އެކަން ފަސްއަޅާ ފޮރުވުން ކަމަށެވެ.

މީގެ އިތުރުން އެމްޑީޕީގެ އެ ހަރުގެ ހުރިތަނަކީ ކާޅު ލޭ ބޭނުންކޮށްގެން ސިހުރު ހަދާފައި ހުރިތަނެއް ކަމަށް ގިނަ ބަޔަކު ތުހުމަތު ކުރާކަމަށާއި، މިއީ ވެރިކަން ކުރާ ޕާޓީއިން ކައްޗަށް އަޅާ ބިންގަލެއްކަމަށްވެސް މަލީހު ވަނީ ވިދާޅުވެފައިއެވެ.

މި ސަރުކާރުން މަސްވެރިންނަށް ދޭންޖެހޭ ފައިސާ ނުދިނުމުގެ ސަބަބުން މަސްވެރިން އަންނަނީ ރާއްޖޭގެ އެކި ކަންކޮޅުތަކުގައި މުޒާހަރާ ކުރަމުންނެވެ. އަދި އެމީހުންނަށް ހައްގު ފައިސާ އެމީހުންނަށް ދިނުމަށް ގޮވާލަމުންނެވެ.