ފިޔޯރީން ގެއްލުނު ކުއްޖާ ފެނުނީ ފަޅުގެއެއްގެ ތެރެއިންކަމާ އެ ކުއްޖާ ފެނުނުއިރު ޝައްކު ކުރެވޭ ބައެއް ކަންކަން ހުރުމުން ތަހުލީލުތަކެއް ކުރަން ނިންމާފައިވާ ކަން ހާމަވެއްޖެއެވެ.

ގދ. ފިޔޯރީން ނުވަ އަހަރުގެ އަންހެން ކުއްޖަކު ގެއްލިގެން ރިޕޯޓުކޮށްފައިވަނީ އިއްޔެގެ ވަގުތެއްގައެވެ.

ފިޔޯރީ، ފިނިވިލާގެ، މަރިޔަމް މީނާލް މުހައްމަދު 9، އިއްޔެ ހަވީރު 17:30 ގެއިން ނުކުތީ މަންމައާ މެދު ހިތްހަމަނުޖެހިގެންނެވެ. އެއީ އޭނާގެ އާދައެއް ކަމަށް އޭނާގެ ބައްޕައާ ހަވާލާދީ "މިހާރު" ނޫހުގައި ރިޕޯޓުކޮށްފައިވެއެވެ.

ނަމަވެސް މީނާލް އަކީ އާންމުކޮށް އެހެން ގެއިން ނުކުމެގެން ދިޔަ ނަމަވެސް އެންމެ ލަސްވެގެން 6 ޖަހާއިރު ގެއަށް ވަންނަ ކުއްޖެއް ކަމަށާ ނަމަވެސް އިއްޔެގެ އެ ވަގުތު ފަހަނަ އަޅާ ދިޔައިރުވެސް މީނާލް ގެއަށް ނައުމުން ރިޕޯޓުކުރީ ކަމަށެވެ.

މީނާލް ގެއްލިގެން ރިޕޯޓުކުރުމުން ހޯދުމުގެ މަސައްކަތްކުރަމުން ދަނިކޮށް ފެނުނީ އެ ރަށު ސަހަރާގެ ދެކުނު ފަރާތުގައި ހުންނަ ފަޅު ގެއަކުންނެވެ. ނަމަވެސް މީނާލްގެ އާއިލާ ދިރިއުޅޭ ގެ ހުންނަނީ އެ ރަށު ސަހަރާގެ އުތުރު ފަރާތުގައެވެ.

މީނާލް ނުފެނިގެން ހޯދަަމުން ދިޔަ ވަގުތުގައި އެ ފަޅު ގޭ ތެރެ ދެތިން ފަހަރަކު ބެލި ކަމަށާ ނަަމަވެސް އޭރު މީނާލް އެ ގޭތެރެއިން ފެނިފައި ނުވާ ކަމަށްވެސް ވެއެވެ. އަދި އެ ގެއަކީ އެ ރަށު މީހަކާ އިންޑިއާ މީހަކު ކައިވެނިކޮށްގެން ދިރިއުޅެމުން ދިޔަ ގެއެއް ކަމަށާ އެގޭގެ ވަށާ ފާރަކީ ވަރަށް އުސްކޮށް ރާނާފައި ހުންނަ ފާރަކަށްވާއިރު އެ ގެއަށް މީނާލްއަށް ވަދެވުނު ގޮތެއްވެސް ނޭނގޭ ކަމަށް ވެއެވެ.

މީނާލް ފެނުނީ އޭނާ ހޯދުމުގެ މަސައްކަތުގެ ތެރެއިން ސަހަރާއާ އިންވެގެން އޮންނަ ކުޑަ މަގުގައި ހުންނަ ކުޑަ ގެއެއް ބަލާ ފާސްކުރުމުގައި ފުލުހުން އުޅެނިކޮށް، މިނާލް ފެނުނު ފަޅު ގެއިން އަޑުތަކެއް އިވިގެން މީހުން ގޮސް އެ ގެ އަނެއްކާ ވެސް ބެލި ބެލުމުންނެވެ.

އެހެންކަމުން މިކަމުގައި ގޮތް ނޭނގޭ އަދި ޝައްކު ކުރެވޭ ބައެއް ކަންކަން އެބަހުރި ކަމަށް، ތޭރަ އޮންލައިނަށް ރަށުން މައުލޫމާތު ދިން މިހަކު ކިޔައިދީފައިވެއެވެ.

މީނާލް ފެނުނުއިރު ކޮންމެ ވެސް ވަރަކަށް ހޭ ހުރި ކަމަށާ ނަމަވެސް ބޮލަށް ފެން އެޅުމުން އެއްކޮށް ހޭ އެރުމުން ފުލުހުން މީނާލ ނަގައިގެން ދިޔައީއެވެ. ނަމަވެސް މީނާލްއަށް ޝޮކެއް ލިބިފައިވާ ކަމަށާ އެހެންކަމުން ވީ ގޮތް ރަގަޅަށް ކިޔައިދޭން އަދި މީނާލްއަށް ނޭނގޭ ކަމަށްވެސް އެމީހާ ވަނީ ކިޔައިދީފައެވެ.

މި ހާދިސާއާ ގުޅިގެން ފުލުހުން އިދާރާއިން ބުނެފައިވަނީ ކުއްޖާ ގެއްލިފައި ފެނުނުއިރު ކުއްޖާގެ ހާލު ރަގަޅު ކަމަށާ ނަމަވެސް ކުޑަ ކުއްޖަކަށްވުމުން ގެއްލިފައި ނުފެނި ގިނަ އިރުވެފައި ފެނުމުން ކުއްޖާގެ ހާލަތު އިތުރަށް ދެނަގަތުމަށްޓަކައި ބައެއް ތަހުލީލުތައް ކުރުމަށް ކުއްޖާ އަބްދުއްސަމަދު މެމޯރިއަލް ހޮސްޕިޓަލަށް ގެންގޮސްފައިވާ ކަމަށާ މި ހާދިސާއާ ގުޅިގެން އިތުރަށް ބަލަން ޖެހޭ ކަންކަން ފުލުހުން ބަލަމުން ގެންދާ ކަމަށެވެ.