ދިވެހީންގެ އަމިއްލަ އެސެޓްތައް އެހެން ފަރާތްތަކަށް، "ދިވެހީންގެ ރާއްޖެ"އިން ދޫކޮށްލައިގެން ނުވާނެ ކަމަށް ކުރީގެ ދާޚީލީ ވަޒީރު އުމަރު ނަސީރު ވިދާޅުވެއްޖެއެވެ.

ރާއްޖޭގެ ބައިނަލްއަގްވާމީ ކޮމާޝަލް ޕޯޓު ކުއްޔަށް ދޫކުރަން އުޅޭކަމުގެ އަޑުތައް ގަދަވެފައިވާތީ އެކަމަށް އިޝާރާތްކުރައްވާ އުމަރު އޭނާގެ ފޭސްބުކް ޕޭޖުގައި ކުރި ޕޯސްޓެއްގައި ވިދާޅުވީ، މާލޭގެ ކަނޑުގެ ބަދަރާއި ތިލަފުށީ ކަނޑުގެ ބަނދަރު ބޭރުގެ ފަރާތަކަށް ދިގު މުއްދަތަށް ކުއްޔަށް ދިނުމުގެ މަޝްވަރާތަކެއް ސަރުކާރުން ކުރިއަށް ގެންދާ ކަމަށެވެ.

މީގެ އިތުރުން އެކަމަކީ އެއީ ދިވެހީންގެ ރާއްޖެ އިން ކުރައްވަންވާނެ ނޫން ކަމަށާ ދިވެހީންގެ ރާއްޖެއިން ކުރަން ވާނެ ކަމަކީ އެސެޓްތައް އުފައްދާ އެ ތަކެތި ދިވެހިންގެ އަތްމަތީގައި ބެހެއްޓުންކަމަށް އުމަރު ވިދާޅުވެފައިވެއެވެ.

ހަމައެހެންމެ މިފަދަ އެސެޓްތައް ބޭރުގެ ފަރާތަކަށް ވިއްކާލުމާއި ދިގު މުއްދަތަށް ކުއްޔަށް ދިނުމަކީ ކަންކަން އަމިއްލައަށް ކުރަން ނުދަންނަ، ކަންނެތް މީހުން އުޅޭ ޤައުމުތަކުން ކުރާކަމެއްގެ ގޮތުގައި އުމަރު ސިފަކުރައްވާފައިވެއެވެ.

އުމަރު ވިދާޅުވީ މާލޭގެ އެއާޕޯޓް އިންޑިއާއަށް ވިއްކައިލުމަށް ކުރިން ކުރެވުނު މަސައްކަތް ފަދަ ކަންކަމަކީ އިގުތިސާދީ ގޮތުން ނުރައްކާތެރި ކަންކަން ކަމަށެވެ.

މިފަދަ ކަންކަމުގެ ސަބަބުން މުދަލުގެ އަގުބޮޑުވެ، ދިވެހި ވިޔަފާރި ތަކަށް އެތައް ދަތިތަކާ ކުރިމަތިވާނެކަމަށާ ދައުލަތުގެ މި ފަދަ ސްޓްރެޓެޖިކް އެސެޓްތަކަކީ އަބަދުވެސް ދިވެހީންގެ އަތްމަތީގައި ބަހައްޓައިގެން ވީހާ ވެސް ހެޔޮ އަގުގައި ޚިދުމަތް ދެވޭ ތަންތަނަށް ވާން ޖެހޭނެކަމަށް އުމަރު ވިދާޅުވިއެވެ.

އުމަރުގެ ކަންބޮޑުވުން މިކަމާ ގުޅިގެން ފާޅުކުރައްވާފައިވައިރު، އަޑުތައް ފެތުރިފައިވާ ގޮތުގައި ޕޯޓު ކުއްޔަން ދުކުރާ ކުންފުންޏާ އެކު ފަހުމު ނާމާގައި މިމަހުގެ 28 ވަނަ ދުވަހު ސޮއިކުރުމަށް ސަރުކާރުން ދަނީ މަސައްކަތްކުރަމުންނެވެ.

މާލެ ސަރަހައްދުގެ ޕޯޓު ދިގު މުއްދަތަކަށް ދޫކޮށްލަން އުޅޭތީ މީގެ ކުރިން ރައީސް އަބްދުﷲ ޔާމީން ކަންބޮޑުވުން ފާޅުކުރައްވާފައިވެއެވެ. އެގޮތުން އޭގެން ލިބޭ ފައިސާއަށް ވުރެ ދިވެހިން އަމިއްލައަށް ތަން ތަރައްގީކުރުމުން ލިބޭ ފައިދާ ބޮޑުވެފައި އެކަމަކީ ދިވެހިންނަށް އަމިއްލަ ކުރެވޭނެ ވަރު ކަމެއް ކަމަށް އެމަނިކުފަނު ވިދާޅުވިއެވެ. އަދި ރައީސް ޔާމީން ވިދާޅުވީ ކިރިޔާ އިގްތިސޯދުގެ ކުޑަ މިންވަރެއް އެނގޭ މީހަކު ނަމަވެސް އެކަން އެ ގޮތަށް ނުކުރާނެ ކަމަށާ މާލެ ޕޯޓު ވިއްކާލައިގެން ހިންގަން އުޅެނީ އިގްތިސޯދީ ބޮޑު ޖަރީމާ އެއް ކަމަށެވެ.