މަސްވެރިންނަށް ފައިސާ ނުލިބޭ މައްސަލަ މާދަމާ ރައްޔިތުންގެ މަޖިލީހަށް ހުށަހަޅާނެކަމުގައި އެމްޑީޕީގެ ޕާލަމެންޓްރީ ގުރޫޕުން ބުނެފިއެވެ.

ރައްޔިތުންގެ މަޖިލީހުގައި މިއަދު ބޭއްވި އެމްޑީޕީގެ ޕާލިމަންޓްރީ ގްރޫޕުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޕީޖީ ލީޑަރު ނާޒިލް ވިދާޅުވީ އެމްޑީޕީން މާދަމާ މަޖީލީހަށް މައްސަލަ ހުށަހަޅާނީ ގަރާރެއްގެ ގޮތުގައިތޯ އަދި ކުއްލި މައްސަލައެއްގެ ގޮތުގައިތޯ އަދި ނުނިންމާ ކަމުގައެވެ. އޭނާ ވިދާޅުވީ މަޖިލިހަށް މައްސަލަ ހުށަހަޅާނީ ކޮންގޮތަކަށް ކަމެއް އަދި ނުނިންމާކަމަށާއި، އެކަމަށް ގޮތެއް ނިންމާނީ ޕާލަމެންޓްރީ ގުރޫޕުގައި މަޝްވަރާ ކޮށްފައި ކަމުގައެވެ.

ނާޒިލް އިތުރަށް ވިދާޅުވީ އީދުގެ ކުރިން މަސައްވެރިންނަށް 120 މިލިއަން ރުފިޔާ ދޭން ޖެހިފައި ހުރިިކަމުގައެވެ. އެހެންނަމަވެސް އީދުގެ ކުރިން މަސްވެރިންނަށް ދޭންޖެހިފައި ހުރި ފައިސާގެ ތެރެއިން މިހާތަނަށް ދީފައިހުރީ 40 މިލިއަން ރުފިޔާ ކަމަށާއި މިހާތަނަށް އަދިވެސް ނުދީ 80 މިލިއަން ރުފިޔާ އޮތް ކަމުގައެވެ.

އޭނާ ވިދާޅުވީ ސަރުކާރުން މަސައްކަތް ކުރަމުންދަނީ ފުލުހުން ބޭނުންކޮށްގެން މަސްވެރިންގެ ހައްގުތައް ނިގުޅައިގަތުމަށް ކަމުގައެވެ.

މީގެ އިތުރުން މަސްވެރިން ކުރަމުން ގެންދާ މުޒާހަރާގައި ބައިވެރިވަނީ އެމްޑީޕީއަށް ނިސްބަތްވާ މަސްވެރިންކަމަށް ވެރިކަން ކުރާ ޕީއެންސީއަށް ނިސްބަތްވާ މަޖިލިސް މެމްބަރު އިބްރާހިމު ޝުޖާއު ވިދާޅުވުމުން އެ ވާހަކައަށް ވެސް މިއަދުގެ ނޫސްވެރިންގެ ބައްދަލުވުމުގައި ރައްދު ދީފައިވެއެވެ.

އެގޮތުން ކެންދޫ ދާއިރާގެ މެމްބަރު އަދި ޓޫރިޒަމް އެމްޕްލޯޔީސް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ މައުރޫފް ޒާކިރު (މަޓޭ) ވިދާޅުވީ މުޒާހިރާ ކުރަމުންދަނީ ހަމައެކަނި އެމްޑީޕީގެ މެމްބަރުން އެކަނި ނޫންކަމަށާއި، މުޒާހިރާ ކުރަމުންދާ ފަރާތްތަކުގެ ތެރޭގައި ޕީއެންސީގެ މެމްބަރުންވެސް ތިބި ކަމުގައެވެ.

މަސްވެރިން ބާނާ މަހަށް ފައިސާ ނުލިބިގެން ހުޅުމީދޫގައި މަސްވެރިން ކުރާ މުޒާހިރާ މެދު ނުކެނޑި އަދިވެސް މަސްވެރިން ގެންދަނީ ކުރިޔަށް ގެންދަމުންނެވެ. މަސްވެރިން މުޒާހިރާ ކުރަމުންދަނީ އައްޑޫ މިފްކޯ ބަނދަރުގައެވެ. އަދި މި ސަރަހައްދުގައި 80 ވަރަކަށް މަސްވެރިން މުޒާހިރާ ކުރަމުންދާ ކަމަށްވެސް ވަނީ މައުލޫމާތު ލިބިފައެވެ.