ފައިސާ ދެވޭނެ ދުވަހެއް ލިޔުމަކުން އެންގުމަށް މަސްވެރިން ޑިމާންޑްކޮށްފިއެވެ.

މިފްކޯ އިން ބުނި ގޮތުގައި އައްޑޫ ހުޅުމީދޫގައި މަސްވެރިން ކުރަމުން އަންނަ މުޒާހަރާގައި މަސްވެރިން ގޮވާލާ ކަންތައްތަކުގެ ތެރޭގައި، ފިޝަރީޒް މިނިސްޓަރު އަހުމަދު ޝިޔާމް ނުވަތަ ރައީސް ޑރ މުހައްމަދު މުއިއްޒުގެ މަންދޫބެއް ވަޑައިގެން މަސްވެރިންގެ ކަންބޮޑުވުންތައް އަޑު އެއްސެވުން ހިމެނެއެވެ.

އަދި އެ މީހުންނަށް ނުދީ ހުރި ފައިސާ ދޭނެ ދުވަހެއް ލިޔުމުން އެންގުމަށް ވެސް ޑިމާންޑު ކުރަމުންދާ ކަމަށް މިފްކޯއިން ވަނީ ބުނެފައެވެ.

ސަރުކާރުން ހާމަކުރި ގޮތުގައި މިހާރު މަސްވެރިންނަށް ނުދެވި ހުރީ 50 މިލިއަން ރުފިޔާއެވެ.

އެ ފައިސާ ވީ އެންމެ އަވަހަކަށް ދީ ހަލާސް ކުރުމަށް ފިޝަރީޒް މިނިސްޓްރީ އާއި އިކޮނޮމިކް މިނިސްޓްރީ އަދި މިފްކޯއިން މަަޝްވަރާކުރަމުންދާ ކަމަށް ވެސް ވަނީ ބުނެފައެވެ.

ނަމަވެސް މަސްވެރިން ޑިމާންޑް ކުރަމުން ދަނީ އެ ފައިސާ ދެވޭނެ ސީދާ ދުވަހެއް ހާމަކުރުމަށެވެ. ފައިސާ ދޭނެ ކަމަށް ބުނެ އެތައް ދުވަހެއް ހޭދަކޮށްފައިވާ ކަމަށާއި ސަރުކާރަށް ވައުދު ނުފުއްދުނު ކަމަށް ވެސް މަސްވެރިން ވަނީ ބުނެފައެވެ.

މި ސަރުކާރުން ވެރިކަމަށް އައީ މަސް ކިރާތާ 48 ގަޑި އިރުގެ ތެރޭގައި ފައިސާ ދޭނެކަމުގެ ވައުދާއެކުގައެވެ.

ނަމަވެސް ފައިސާ ނުދީ ލަސް ކުރަމުން ގެންދާތީ މަސްވެރިން އަންނަނީ ސިލްސިލާގޮތެއްގައި އިހުތިޖާޖް ކުރަމުންނެވެ.