ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ)އިން ކުރިއަށް އޮތް މަޖިލިސް އިންތިހާބުގައި ވާދަކުރާނެ ކެންޑިޑޭޓުން ހޮވުމަށް ބާއްވަން ނިންމި ޕްރައިމަރީގައި ވަކި ބަޔަކަށް ވާދަކުރުމުގެ ފުރުސަތު ނެތް ކަމަށް ބުނެ ފޮނުވި ސިޓީތަކާ އެކު ރައްޔިތުންގެ ޕްރެޝަރ ބޮޑުވެ ޕާޓީގެ ޗެއަރ ޕާސަން އަބްދުއްރަހީމަށް ގޮތް ހުސްވެ ކުރިން ނިންމި ނިންމުން ބަދަލުކޮށްފިއެވެ.

އަބްދުއްރަހީމު ކުރި ޓްވީޓެއްގައި ވަނީ އެކަން ޕާޓީގެ ރައީސް، އަދި ރާއްޖޭގެ ރައީސް ޑރ. މުހައްމަދު މުއިއްޒުއާ ޖާމިނުކޮށްފައެވެ.

އެގޮތުން އެ ޓްވީޓުގައި އަބްދުއްރަހީމު ބުނެފައިވަނީ ޝަކުވާތަކަށް ރިޢާޔަތް ކުރެއްވުމަށްފަހު، ޕްރައިމަރީގައި ވާދަކުރަން ނަން ހުށަހެޅުއްވި ހުރިހާ ބޭފުޅުންނަށް ވާދަ ކުރެއްވޭ ގޮތަށް ޕްރައިމަރީ ބާއްވަން ޕާޓީގެ ރައީސް،ރައީސް ޑރ.މުޙައްމަދު މުޢިއްޒު ނިންމަވަފައިވާ ކަމަށެވެ.

ނަމަވެސް ޗެނަލް13އަށް މައުލޫމާތު ލިބިފައިވާ ގޮތުގައި މި ފަދަ ނިންމުމެއް ނިންމާފައިވަނީ ޕީއެންސީ ޕްރައިމަރީ ގައި ވާދަކުރަން ނިންމާފައިވާ އެތައް ބަޔަކަށް ނަން އަނބުރާ ނެގުމަށް އަންގާ ޕާޓީއިން ސިޓީ ފޮނުވުމުން އެ ކަމާ ނުރުހި ޕާޓީއިން ވަކިވާނެކަމުގެ އިންޒާރު އެތައް ބަޔަކު ދިނުމުންކަމަށެވެ.

ޕާޓީއަށް ހިދުމަތްކޮށްނުދޭތީ ކަމަށް ބުނެ ބައެއް މީހުންގެ ނަން އަނބުރާ ނެގުމަށް އަންގާފައިވާ އިރު އެ ދާއިރާތަކުގެ ޓިކެޓު ޕާޓީއަށް ދުވަހަކުވެސް ހިދުމަތެއް ކޮށްދީފައިނުވާ ފާތިމަތު ސައުދާ މެން ފަދަ މީހުންނަށް ދީފައިވާކަން ފާހަގަކޮށް ގިނަ ބަޔަކު ވަނީނުރުހުން ފާޅުކޮށް ފާޑުކިޔުން އަމާޒުކޮށްފައެވެ.