ރައީސް ޑރ މުހައްމަދު މުއިއްޒާ "ގާތްވުމަށް" ސިހުރު ހެދިކަމުގެ ތުހުމަތުގައި ހައްޔަރުކުރި އެންވަޔަރަމެންޓު މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް މަގާމުން ވަކިކޮށްފި އެވެ.

ޝަމްނާޒް ހައްޔަރުކޮށްފައިވަނީ ސީދާ ކޮން ތުހުމަތެއްގައި ކަމެއް ފުލުހުން ހާމަކޮށްފައި ނުވީނަމަވެސް މައުލޫމާތު ލިބުނު ގޮތުގައި އޭނާ އާއެކު އިތުރު ދެ މީހަކު ވެސް ހައްޔަރުކޮށްފައިވަނީ "ސިހުރު" ހެދި ކަމުގެ ތުހުމަތުގައެވެ.

މި ތިން މީހުންގެ ބަންދަށް ކްރިމިނަލް ކޯޓުން ވަނީ 7 ދުވަހުގެ މުއްދަތެއް ޖަހާފައެވެ.

ޝަމްނާޒް މަގާމުން ވަކިކޮށްފައިވާ ކަމުގެ މައުލޫމާތު "ތޭރަ އޮންލައިން" އަށް ވަނީ ކަށަވަރުވެފައެވެ.

ރައީސް އޮފީހުގެ ވެބްސައިޓުން ވެސް މިކަން ސާފުވެއެވެ. ރައީސް އޮފީހުގެ ވެބްސައިޓް ގައި ވެސް މިހާރު ފެންނަން ހުރީ އޭނާ އަކީ ކުރީން އެ މަގާމުގައި ހުރި މީހެއްގެ ގޮތުގައެވެ.

ޝަމްނާޒް އެންމެ ފުރަތަމަ މަސައްކަތް ކުރެއްވީ މުލިއާގޭގައެވެ. ނަމަވެސް ފަހުން އޭނާ ވަނީ އެންވަޔަރަމެންޓް މިނިސްޓްރީއަށް ބަދަލުކޮށްފައެވެ.

ޝަމްނާޒް ހައްޔަރުކޮށްފައިވާ ދަނޑިވަޅުގައި އޭނާގެ ކުރީގެ ފިރިމީހާ އަދި ރައީސް މުއިއްޒުގެ އަރިސް ބޭފުޅެއްކަމަށްވާ، ރައީސް އޮފީހުގެ މިނިސްޓާރ އާދަމް ރަމީޒް ވެސް ވަނީ މަގާމުން ސަސްޕެންޑް ކޮށްފައެވެ. މިކަން ރައީސް އޮފީހުގެ އިސް ތަރުޖަމާނު ހީނާ ވަލީދު ވަނީ ކަށަވަރުކޮށްދެއްވާފައެވެ.