ސިހުރު ހެދިކަމުގެ ތުހުމަތުކޮށް ހައްޔަރު ހުރި އެންވަޔަރަމެންޓު މިނިސްޓަރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒު އަލީ ސަލީމްއާ ދެކޮޅަށް އެއްވެސް ހެއްކެއް ފުލުހުންނަށް ނުދެއްކޭ ކަމަށާއި ޝަމްނާޒުގެ ކުރީގެ ފިރިމީހާ އާދަމް ރަމީޒުއާ ދެކޮޅަށް ބަޔާން ދީފިނަމަ ދޫކޮށްލާނެ ކަމަށް ފުލުހުން ޝަމްނާޒު ގާތުގައި ބުނަމުން ދާކަމަށް ޝަމްނާޒުގެ ވަކީލު އަލީ ޝާހު ވިދާޅުވެއްޖެއެވެ.

ތޭރަ އޮންލައިން އަށް މައުލޫމާތުދެމުން ޝަާހް ވިދާޅުވީ ޝަމްނާޒުއާ ދެކޮޅަށް އެއްވެސް ހެއްކެއް ފުލުހުންނަށް ނުދެއްކޭއިރު ވެސް އޭނާ ހައްޔަރު ކޮށްފައި ހުރީ ފްރޭމް ކޮށްގެން ކަމަށެވެ.

ސަރުކާރުން ބޭނުންވަނީ ފުލުހުން ލައްވާ ރަމީޒްގެ މައްޗައް ޖިނާއީ ކުށުގެ ދައުވާއެއް ކުރަންކަމަށާއި އެކަން ކުރެވޭނީ ޝަމްނާޒް ރަމީޒް އާ ދެކޮޅަށް ހެކިބަސް ދީގެން ކަމުން ފުލުހުން ގެންދަނީ ޝަމްނާޒް އަށް މަޖުބޫރުކުރަމުން ކަމަށް ވެސް ޝާހް ވިދާޅުވިއެވެ.

ސިހުރު ހެދުމުގެ ތުހުމަތުގައި ޝަމްނާޒު އާއި އޭނާގެ އެއްބަނޑު އެއްބަފާ ކޮއްކޮ ސަނާ ސަލީމް ހައްޔަރު ކޮށްފައިވަނީ ޖޫން މަހުގެ 23 ވަނަ ދުވަހު އެވެ.

އޭގެފަހުން ދެ ފަހަރެއްގެ މަތިން ހަތް ދުވަހުގެ މުއްދަތު ޖެހުމަށްފަހު މިދިޔަ ހޯމަ ދުވަހު ވަނީ އެ ދެމީހުންގެ ބަންދަށް އިތުރު ފަސް ދުވަސް ޖަހައިފަ އެވެ.

ތިންފަހަރެއްގެ މަތިން އެމީހުންގެ ބަންދުގެ މުއްދަތު އިތުރު ކުރިއިރު ވެސް ޝަމްނާޒުއާ ދެކޮޅަށް އެއްވެސް ހެއްކެއް ފުލުހުންނަށް ނުދެއްކޭ ކަމަށް ޝާހު ވަނީ ތަކުރާރުކޮށް ވިދާޅުވެފައެވެ.

ޝާހް ވަނީ މިކަން ކުރުމުގައި އިންޓެލިޖެންސް ޑިޕާޓްމަންޓްގެ ހެޑް (މެޑަމް ސާޖިދާ) ގެ ކޮއްކޮ އިސްކޮށް އުޅުއްވާކަމަށް ވެސް ތުހުމަތުކުރައްވާފައެވެ.