މި އަހަރުގެ މާޗް މަހު ދައުލަތުން ކުރި ޖުމްލަ ޚަރަދު، މިދިޔަ އަހަރުގެ މާޗް މަހަށް ވުރެ 115.3 މިލިއަން ރުފިޔާ އިތުރު ވެފައި ވާކަން ހާމަވެއްޖެއެވެ.

މިކަން ހާމަވެފައިވަނީ، ރާއްޖޭގެ މަރުކަޒީ ބޭންކް (އެމްއެމްއޭ) އިން ޝާއިއު ކޮށްފައިވާ ޖޫން މަހުގެ "އިކޮނޮމިކް އަޕްޑޭޓް"އިންނެވެ.

އެ މައުލޫމާތުން ހާމަވާ ގޮތުގައި މި އަހަރުގެ މާޗް މަހު ދައުލަތުން ކުރި ޖުމްލަ ޚަރަދު، ކުރީ އަހަރުގެ މާޗް މަހު ކުރި ޚަރަދަށް ވުރެ 3 އިން ސައްތަ އިތުރުވެފައިވެއެވެ. ހިސާބުތައް ދައްކާ ގޮތުން އިތުރުވެފައިވަނީ ރިކަރަންޓު ޚަރަދު ނުވަތަ ދައުލަތް ހިންގުމަށް ކުރި ޚަރަދެވެ.

އެގޮތުން މިއަހަރުގެ މާޗް މަހު ރިކަރަންޓް ޚަރަދުތަކުގެ ގޮތުގައި ޚަރަދު ކުރި މިންވަރު 559.8 މިލިއަން ރުފިޔާ އަށް އަރާފައިވާ ކަމަށް އެމްއެމްއޭ އިން ހާމަކޮށްފައިވެއެވެ.

ދައުލަތުގެ ޖުމްލަ ޚަރަދުތައް ބޮޑުވެފައިވާކަން މައުލޫމާތުގެ އަދާހަމައިން އެނގޭއިރު 2023 ވަނަ އަހަރުގެ މާޗް މަހު ކޮށްފައިވާ ކެޕިޓަލް ޚަރަދުތަކާ އަޅާ ބަލާއިރު، 2024 ވަނަ އަހަރުގެ މާޗް މަހުގެ ކެޕިޓަލް ޚަރަދުތައް 444.5 މިލިއަން ރުފިޔާ ދަށަށް ގޮސްފައިވާ ކަމަށެވެ.

ހަމައެހެންމެ އެމްއެމްއޭ އިން ބުނެފައިވަނީ ދައުލަތައް މާޗް މަހު ލިބުނު ޖުމްލަ އާމްދަނީ ކުރީ އަހަރުގެ މާޗް މަހާ އަޅާ ބަލާއިރު 560.3 މިލިއަން ރުފިޔާ މައްޗަށް ގޮސްފައިވާ ކަމަށެވެ. އާމްދަނީ 20 އިން ސައްތައިގެ ކުރިއެރުމެއް ލިބުނު އިރު އެއީ ޓެކްސްގެ ގޮތުގައި ދެއްކި ފައިސާ އިތުރު ވުމުން ކަމަށް އެމްއެމްއޭ އިން ބުނެއެވެ.

އެމްއެމްއޭ އިން އާންމު ކޮށްފައިވާ އަދާހަމަތަކުން އެނގޭ ގޮތުގައި، މާޗް މަހު ޓެކްސްގެ ގޮތުގައި ލިބުނު ފައިސާ 671.1 މިލިއަން ރުފިޔާއަށް މައްޗަށް ގޮސްފައިވެއެވެ. އެހެން ނަމަސްވެސް ޓެކްސް ނޫން ގޮތުގައި ލިބުނު ފައިސާ ވަނީ 117.1 މިލިއަން ރުފިޔާ ދަށަށް ގޮސްފައެވެ.

ދައުލަތް ހިންގުމަށް ޚަރަދުކުރި މިންވަރު އިތުރުވެފައިވާއިރު، މި ސަރުކާރުގެ ހިންގުމުގެ ޚަރަދުތައް އިތުރުވެފައިވަނީ މަގާމުތަކަށް ކުރާ ހޭދަ އިތުރުވެގެން ކަމަށް ބެލެވެއެވެ. އަދި ޚަރަދުތައް ކުޑަ ނުކޮށްފިނަމަ ރާއްޖެ ބަގްރޫޓު ވެދާނެކަމުގެ އިންޒާރު ދުނިޔޭގެ މާލީ އިދާރާތަކުން ދިފައިވާ ކަންވެސް ފާހަގަކޮށްލެވެއެވެ.