ދައުލަތުގެ ދަރަންޏާ ބެހޭ ބިލް އެޖެންޑާކޮށް މަޖިލީހުގެ ޖާލްސާއެއް އާދިއްތަ ދުވަހު ބޭއްވުމަށް ތާވަލުކޮށްފިއެވެ.

އާދިއްތަ ދުވަހަށް ޖަލްސާއެއް ބާއްވަން ތާވަލުކޮށް އެ ޖަލްސާގެ އެޖެންޑާ މަޖިލީހުގެ ވެބްސައިޓްގައި އާންމުކޮށްފައެވެ.

އާދިއްތަ ދުވަހުގެ ޖަލްސާގެ އެޖެންޑާގައި ސަރުކާރުގެ ފަރާތުން ފުނަދޫ ދާއިރާގެ މެންބަރު މުހައްމަދު މަމްދޫހު ހުށަހަޅުއްވާފައިވާ "ދައުލަތުގެ ދަރަންޏާ ބެހޭ ބިލް" ގެ މަސައްކަތާއި ޔޫރަޕިއަން ޔޫނިއަން އާއެކު ސަރުކާރުން ސޮއިކުރާ ސަމޮއާ އެގްރިމެންޓަށް ރުހުން ހޯދުމާމެދު ގޮތެއް ނިންމުން ހިމެނެއެވެ.

އޭގެ އިތުރުން ތުރުކީއަށާއި ސައުދީ އަރަބިއްޔާއަށް ރާއްޖެއިން ކަނޑައަޅާ ސަފީރުން އައްޔަނު ކުރުމާމެދު މަޖިލީހުގެ ޚާރިޖީ ގުޅުންތަކުގެ ކޮމިޓީން ނިންމި ގޮތުގެ ރިޕޯޓުގެ މަސައްކަތްވެސް މާދަމާގެ ޖަލްސާއަށް ތާވަލު ކޮށްފައިވެއެވެ.

މަޖިލީހުގެ ޖަލްސާއެއް އާދީއްތަ ދުވަހަށް ތާވަލު ކޮށްފައިވާއިރު ރާއްޖޭގެ އިގްތިސާދު ހަމަމަގަށް އަޅުވައި މާލީ ހާލަތު ރަނގަޅު ކުރުމަށްޓަކައި ޚާއްސަ ފިޔަވަޅުތަކެއް އެޅުމަށް ރައީސް ޑރ. މުޢިއްޒު ވަނީ ނިންމަވާފައިވާކަން ހާމަކުރައްވާފައިވެއެވެ.