ރައީސް ޑރ މުހައްމަދު މުއިއްޒުގެ ޅިޔަނު އަދި 20 ވަނަ ރައްޔިތުންގެ މަޖިލީހުގެ މައްޗަންގޯޅި އުތުރު ދާއިރާގެ ޕީއެންސީ މެމްބަރު އިބްރާހީމް މުހައްމަދަށް "ފިސްކަލް" އެއީ ކޯއްޗެއް ކަން ނޭނގޭކަން ހާމަވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ދައުލަތުގެ ފިސްކަލް ޒިންމާގެ ބިލު ސަރުކާރުގެ ފަރާތުން މިއަދު ހުށަހަޅައި ވަނީ ބަހުސްކޮށްފައެވެ.

އެގޮތުން ކޮންމެ މެމްބަރަކު ވެސް ބަހުސް ކުރި އުޞޫލުން މެމްބަރުން އިބްރާހިމް ވެސް ވަނީ އެ ބިލަށް ބަހުސް ކުރައްވަން މަސައްކަތްކޮށްފައެވެ.

ނަމަވެސް "ފިސްކަލް" ކިޔުމުގެ ބަދަލުގައި މެމްބަރު ވަނީ ބިލުގެ ނަން ނުބައިކޮށް ކިޔާފައެވެ.

މިކަމާ މީސްމީޑިޔާގައި ގިނަ ފަރާތްތަކުން އަންނަނީ މެމްބަރު އިބްރާހިމަށް މަލާމާތް ރައްދުކުރަމުންނެވެ.

ބިލަކީ ކިހިނެއްވާ، ކޮންފަދަ ބިލެއްކަން ނޭނގޭ ހާލަތުގައި ވެސް ތިމާ މީހާގެ މޮޅުކަން ސާބިތު ކުރުމުގެ ބޭނުމަގަޔާއި ސަރުކާރަށް ސަނާ ކިޔަން ލިބޭ ފުރުސަތުގެ ބޭނުން ހިފުމަށްޓަކައި މެމްބަރު އިބްރާހިމް މޮޅު އެއްޗެއް ބުނެލީކަމަށް ބުނެ އިދިކޮޅުގެ ފަރާތްތަކުން އަންނަނީ ފާޑުކިޔުން އަމާޒުކުރަމުންނެވެ.

ދާދި ފަހުންވެސް މެމްބަރު އިބްރާހިމް ވަނީ މަޖިލީހުގެ ޖަލްސާއެއްގައި ސިއްހީ ހިދުމަތް ދިނުމުގެ ގާނޫނަށް ބަދަލުތަކެއް ގެންނަން ހެންވޭރު ދެކުނު ދާއިރާގެ ޕީއެންސީ މެމްބަރު ހުސައިން އިމްރާން ލަތީފު ހުށަހެޅުއްވި ބިލަށް ބަހުސް ކުރައްވަމުން ތަރުކާރީގެ ސިފައިގައި، އެކިއެކި ވިހަ މާއްދާތައް އެކުލަވައިގެން އުފެއްދިފައި ހުރި، ނުވަތަ އެކަށީގެން ނުވާ ގުރޯތު ހޯމޯން، ތަރުކާރީ މޭވާގެ ތެރޭގައި ހިމެނިގެން އައިސް އެ ކެވިގެން، ވަރަށް ޅައުމުރުގައި އަންހެން ކުދިންގެ މޫނުމަތީގައި ފެންނަން ނުޖެހޭ އިސްތަށި ފެނި އެފަރާތްތަކުގެ ރީތިކަަމަށް ބުރޫއަރައިގެންދާ މަންޒަރު ފެންނަ ކަމަށް ބުނެފައެވެ.

މިކަމާ ސިއްހީ މާހިރުން ވެސް ވަނީ މެމްބަރަށް ވަރަށް ބޮޑަށް ފާޑުކިޔުން އަމާޒުކޮށްފައެވެ. އަދި އެފަދައިން އިސްތަށި އަންހެން ކުދިންގެ މޫނުގައި ފަޅަނީ ކެވޭ ތަރުކާރީގެ ސަބަބުން ނޫންކަމަށާއި އެހެން އެކަންވާން ދިމާވަނީ ޕީސީއޯއެސް ފަދަ ބަލިތަކުގެ ސަބަބުން ކަމަށް ވެސް އެ ފަރާތްތަކުން ވަނީ ބުނެފައެވެ.