އެއްވެސް ސަރުކާރަކީ ދަރަނިން މިންޖުވެގެންވާ ސަރުކާރެއް ނޫނެވެ. ދަރަނި ނެގުމާ ދަރަނި އަދާކުރުމަކީ ސަރުކާރުތަކުގެ ތޮބީއަތެވެ. ކޮންމެ ސަބަބަކާ ހުރެގެން ވިޔަސް އަދި ކޮންމެ ބަޔަކު ކުރިކަމަކުންވިޔަސް ރާއްޖެ އޮތީ ވަރަށް ބޮޑަށް ދަރަނިވެރިވެފައެވެ. ދަރަނިތައް މެނޭޖުކޮށް ދަރަނި އަދާކުރުމަކީ އެއިރަކު އޮންނަ ސަރުކާރަކުން ކުރަންޖެހޭ ކަމެކެވެ.

ވެރިކަން ބަދަލުކުރަނީ ވެރިކަމުގައި އޮތް ސަރުކާރު ކަމުނުގޮސްގެންނެވެ. ވެރިކަން ނިމުމުން އެމީހުންގެ ޒިންމާ އެ ނިމުނީއެވެ. ވެރިކަން ބަދަލުވެ ވެރިކަމަށް އެހެން ބަޔަކު އައުމުން ގައުމު ހިންގުމަކީ އެ އޮތް ސަރުކާރެއްގެ ކަމެކެވެ. ކުރީ ސަރުކާރު ކިޔަކިޔާ ތިއްބަކަސް ނަތީޖާއެއް ހާސިލެއް ނުވެއެވެ. އޭރުން އަބަދުވެސް ޖެހޭނީ ދިފާއަށް ކުޅޭށެވެ. ގެއްލޭނީ ވަގުތާއި ހަކަތައެވެ. ދަރަނި އޮންނަނީ ނުދެއްކިއެވެ. ކުރީ ސަރުކާރޭ ހުއްޓާ ނުލާ ކީމާ ކުރީ ސަރުކާރުގައި އުޅުނު މީހުން ދަރަނި އަދާކޮށްދޭނެ ހެއްޔެވެ. ނުދޭނެއެވެ.

އެެއްވެރިކަމުން އަނެއް ވެރިކަމަށް ދަރަނި ވާރުތަނުވެ ސާފު ފައިދާގައި ވެރިކަމެއް ރާއްޖޭގައި ބަދަލުވީ ކޮން އިރަކުހެއްޔެވެ. ރައީސް އިބްރާހިމު ނާސިރުގެ ވެރިކަންނިމި ރައީސް މައުމޫނު ވެރިކަމާ ހަވާލުވެ ވަޑައިގެން އިރުވެސް ރާއްޖޭގައި ދަރަނި އޮތެވެ. ލޯނާއި ބަޖެޓް ސަޕޯޓާއި ޓީ ބިލާއި ޓީ ބޮންޑުން އަރައިގެން ވެރިކަމެއް ދިވެހިން ނުދެކެއެވެ.

ކަންކަން މިހެން ހުރިއިރު ރައީސް މައުމޫނު އަބދުލްގައްޔޫމުގެ ވެރިކަން ބަދަލުކުރަން އުޅުނު އިރު އެންމެ ބާރަށް ދެއްކި އެއް ވާހަކައަކީވެސް ދަރަނީގެ ވާހަކައެވެ. ރައީސް މުހައްމަދު ނަޝީދު ވެރިކަން ދައުރު ހަަމަނުވަނީސް ނިމުމަކަށް އައުމުގެ މައިގަނޑު އެއް ސަބަބަކަށްވީވެސް ދަރަނިވުމެވެ. ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައިވެސް ގައުމުގެ ދަރަނީ ވީ އިތުރެވެ.

ރައީސް އަބްދުﷲ ޔާމީންގެ ވެރިކަމުގެ އުފާފަގަތި ފަސް އަހަރަށް ފަހު އަނެއްކާވެސް ފެނިގެން ދިޔައީ ދަރަނި ބޮޑުތަނުން އަރައިގެން ދިޔަ މަންޒަރެވެ. އެގޮތުން ރައީސް އިބްރާހިމު މުހައްމަދު ސޯލިހުގެ ވެރިކަމަށް ވާރުތަ ކުރި ދައުލަތުގެ ދަރަނިތަކާއެކު ދައުރު ނިމުމުނުއިރު 40 އަހަރުގެ ތެރޭގައި ދިވެހިންގެ ދަރަނި އިތުރުނުވާ މިންވަރަށް ދަރަނި އިތުރުވެފައިވެއެވެ.

އެހެންކަމުން 2023ގެ ރިޔާސީ އިންތިހާބުގެ ދުވަސްވަރުވެސް އެންމެ ގަދައަށް އޭރުގެ އިދިކޮޅު ކެންޑިޑޭޓު ދެއްކެވީ ރާއްޖޭގެ ދަރަނީގެ ވާހަކައެވެ. ދަރަނި ދަންތުރައިން ރާއްޖެ ސަލާމަތް ކުރެވޭނީ އެމަނިކުފާނު ވެރިކަމަށް އައިސްގެން ކަމަށް ނުހަނު ހަރު އަޑުފުޅުން ރައީސް މުއިއްޒު ވިދާޅުވިއެވެ. އަދި ވެރިކަމުގެ ކުރިންވެސް ދަރަނި ދެއްކުމުގެ ފޯމިއުލާ ހޯދާފައިވާކަމާ އަދި ދަރަނި ދައްކަން އެހީވެސް ބޭރު ގައުމުތަކުން ލިބިފައި ހުރިކަންވެސް އިއުލާންވެސް ކުރެއްވިއެވެ.

އެއަށް ފަހު ލިބުނު ވެރިކަމަށް 8 މަސް ފުރުނުއިރު މި ފެންނަނީ ވެރިކަމުގެ ހަތް މަހުގައިވެސް ހިފަހައްޓާނުލެވި ކުރީ ސަރުކާރުގެ ވާހަކަ ދައްކާ ތަނެވެ. ކުރި ސަރުކާރޭ ނުކިޔާނަމޭ ބުނެ އައިސް ދުލު ކުރީގައި "ކުރީ ސަރުކާރު" ތަސްބީހައެއްހެން އޮތް މަޒަންރެވެ.

ވެރިކަމާ ހަވާލުވާން ފޫގަޅާލިއިރުވެސް ރާއްޖޭގައި ދަރަނި އޮތީ ނުކިއްސަރު ފައްތަރެއްގައި ކަމުގެ އިންޒާރު ދުނިޔާގެ މާލީ އިދާރާތަކުން ދީފައި އޮތްކަން ގައިމުވެސް އެނގޭނެއެވެ. އެ ވާހަކަ އޭރު މި ބޭފުޅުން ދައްކަން ވެސް ދެއްކިއެވެ.

އެހެންކަމުން ވެރިކަމަށް އައިސް ޖަހާނެހާ ސަކާރަތެއް ޖަހާ ގަންނާނެ ހާ ގަނޑެއް ގަނެފައި އަރުވާނެހާ ހަވައެއް ދައުލަތުގެ ފައިސާ އިން އެެރުވުމަށްފަހު ދެން ނުކުމެ ރައްޔިތުންނަށް އިގްތިސޯދީ ހާލަތު އެނގެން ޖެހެއޭ ހިތި ބޭހޭ ފާ ފަފަޅޮލޭ ކިޔަކަސް ކަމަކު ނުދާނެއެވެ.

ސިޔާސީ ބޯޅަޖަހަން ނޫޅެ އިހުލާސްތެރި މަސައްކަތެއް ކުރާކަށް އަދިވެސް ނުވަނީ ބާއެވެ؟ ރައްޔިތުންގެ ރުހުމާ ތާއީދު ހޯދަން މީޑިއާ ސްޓަންޓް ޖެއްސިޔަސް ތިޔަ ކަންވާރުތަކުގައި ހުރިވަރާ ތިޔަ ކަންވާރުން ފެލާނެ ދިޔަވެސް ދިވެހިންނަށް އެނގެއެވެ. ޖައްސާ މީޑިއާ ސްޓަންޓަކުން ގައުމުގެ ހާލަތު ބަދަލެއް ނުކުރެވެއެވެ. ހާލަތު ބަދަލުވާނީ އިހުލާސްތެރި ކަމާއެކު ކުރާ ތެދުވެރި މަސައްކަތުންނެވެ.

އަދި އެއް ވާހަކައެވެ. ދަރަނިވެރިވުމުގައި ކުރީ ސަރުކާރުގައި އުޅުނު ބައެއްގެ ފަސާދައާއި ހިޔާނާތެއް އޮތްނަމަ މޫނަކަށް ކަނދުރާއަކަށް ނުބަލާ ތަހުގީގުކޮށް ޝަރީއަތްކޮށް ދޭންޖެހޭ އަދަބެއް ދީބަލާށެވެ. ހޯދަންޖެހޭ ފައިސާއެއް ހޯދާބަލާށެވެ. ތިން އިރު ކާބޭހެއްހެން މީޑިއާތަކަށް އަރާތިބެ އުޑުގައި ޖެހިފަ ބިމުގައި ޖެހުނަސް ވާނެ ކަމެއް ހަރާމުން ހަރާމެވެ. ކާޅުގޮވާހެން ރާގު ރާގަށް ކުރީ ސަރުކާރޭ ގޮތްވަކަސް ރައްޔިތުންގެ ތާއީދު އިތުރުވެ ދަރަނި ތިރިއެއްވެސް ވަކި ނުވާނެއެވެ. ދަރަނިން ބައި ސެންޓުވެސް ބޮލުން ނައްޓައެއް ނުލެވޭނެއެވެ.

ކުރީ ސަރުކަރު ކުރީ ސަރުކާރު، ކިޔާ ތެޅުނުވަރަށް ހުޅުނބު ކޮޅު ދިޔުމުގެ ކުރިން ދަރަނި އަދާކުރެވޭނެ ގޮތް ރާއްޖެ ދުށް އެންމެ ކުޅަދާނަ އިކޮނޮމިސްޓު ރައީސް އަބްދުﷲ ޔާމީން ކައިރިން އަހާ އޮޅުން ފިލުވައިގެން ކުރިއަށް ދިއުން ބުއްދިވެރިއެވެ.