މިއަހަރުގެ ޖެނުއަރީ މަހުން ފެށިގެން ސަސްޕެންޝަނުގައި ތިބި ޔޫތު މިނިސްޓްރީގެ ތިން ނައިބު ވަޒީރުން ކަމަށްވާ، މަލްޝާ ޝަރީފާއި، މަރިޔަމް ޝިއުނާ އަދި މަހުޒޫމް މާޖިދު ވަޒީފާގެ އެއްވެސް މަސައްކަތެއް ނުކުރައްވާ ގޭގައި ތިބެގެން، މުސާރަ އާއި އިނާޔަތުގެ ގޮތުގައި ދައުލަތުގެ ބަޖެޓުން ފަސް ލައްކަ ރުފިޔާ ނަންގަވައިފިއެވެ.

މި ތިން ނައިބު ވަޒީރުން ސަސްޕެންޑްކޮށްފައިވަނީ އިންޑިއާގެ ބޮޑުވަޒީރު ނަރެންދްރަ މޯދީއަށް ސޯޝަލް މީޑިއާގައި ފުރައްސާރަކުރި މައްސަލައިގައެވެ.

މައުލޫމާތު ހޯދައި ލިބިގަތުމުގެ ދަށުން "ތޭރަ އޮންލައިން" ގެ ފަރާތުން ޔޫތް މިނިސްޓްރީ އަށް ހުށަހެޅި އާރްޓީއައި އަށް އެ މިނިސްޓްރީން ޖަވާބު ދީފައިވަނީ އިއްޔެގެ ވަގުތެއްގައެވެ.

އެގޮތުން "ތޭރަ އޮންލައިން" އިން ވާނީ މި ތިން ނައިބު ވަޒީރުންގެ މުސާރަ އަދި އެލަވަންސްގެ ތަފްސީލް ހޯދާފައެވެ.

އެ މިނިސްޓްރީން ދިން ޖަވާބުގައި ވާގޮތުން ކޮންމެ މީހަކަށް މުސާރައިގެ ގޮތުގައި 18،000 ރުފިޔާ ލިބެއެވެ. އަދި ލިވިންގ އެލަވަންސްގެ ގޮތުގައި 12،500 ރުފިޔާ ލިބެއެވެ. އަދި އޭގެއިތުރުން މޯބައިލް ފޯން އެލަވަންސްގެ ގޮތުގައި 1000 ރުފިޔާ ލިބެއެވެ. އެހެންކަމުން ޖުމްލަ 31،500 ރުފިޔާ މި ތިން ނައިބު ވަޒީރުންނަށް ވެސް ކޮންމެ މަހަކު ސަރުކާރުން ދެޔެއެވެ.

ސަސްޕެންޑްކޮށްފައިވަނީ ޖެނުއަރީ މަހުގެ 7 ވަނަ ދުވަހުގައި ކަމުން އެ ދުވަހުން ފެށިގެން މިހާތަނަށް ދިން ޖުމްލަ މުސާރަ އެއް ކޮށްލުމުން ސަސްޕެންޝަނުގެ މުއްދަތުގައި މިއަދާ ހަމައަށް ކޮންމެ ނައިބު ވަޒީރަކަށް މުސާރައާއި އިނާޔަތްތަކުގެ ގޮތުގައި 1،89،000ރ. ވަނީ ދީފައެވެ.

ގޭގައި ތިބެ މަގާމުގެ އެއްވެސް މަސްއޫލިއްޔަތެއް އަދާނުކުރައްވާ ޝިއުނާ، މަލްޝާ އަދި މަހްޒޫމު ވަނީ މުސާރައާއި އިނާޔަތްތަކުގެ ގޮތުގައި ޖުމްލަ 5،67،000ރ. ނަންގަވާފައެވެ.

ރާއްޖޭގެ އިގްތިޞާދީ ހާލަތު މިހާ ނާޒުކުވެފައިވާ ދަނޑިވަޅެއްގައި އެއްވެސް މަސައްކަތެއް ނުކޮށް ގޭގައި ތިއްބަވާ ނައިބު ވަޒީރުންނަށް ބަރާބަރަށް މުސާރައާއި އިނާޔަތް ރައްޔިތުންގެ ފައިސާއިން ދެމުންގެންދާތީ ގިނަބަޔަކު އަންނަނީ ރައީސް މުއިއްޒުގެ ސަރުކާރަށް ފާޑުކިޔުން އަމާޒުކުރަމުންނެވެ.