ނިމިދިޔަ ދެ މަހެއްހާ ދުވަސް ތެރޭ އެންމެ އަޑުހަރުކޮށް ދެކެވުނީ "އިޒްރޭލް ޕާސްޕޯޓް" މަނާކުރުމަށް ގޮވާލި ވާހަކަތަކެވެ. ސަރުކާރުން އެކަމުގައި ކަންތައް ކުރައްވަމުން ގެންދަވާ ގޮތް ދޯހަޅި ވާހަކައެވެ. މި އަޑު ކުއްލިއަކަށް ކެނޑިއްޖެއެވެ. މިއަދު މިވާހަކަ ދައްކަން ތިބީ ދެތިން މީހެކެވެ.

ވާނީވެސް އެހެންތާއެވެ. އެ އަޑު މަޖިލިސް ތެރެއިން ކަނޑުވާލީއެވެ. ހަމަ ގަސްތުގައެވެ. މިކަން ކުރެއްވުމުގައި އެންމެ އިސްކޮށް އުޅުއްވަނީ ވެސް ސަރުކާރު ހިންގާ މައި ޕާޓީ ޕީއެންސީގެ ޕާލިމަންޓް ގްރޫޕްގެ ލީޑާރ އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހެވެ. ފަލާހް މިކަން ކުރައްވާނީ މިގޮތައް ކަން މާ ކުރިންވެސް އޮތީ ފަހުމްވެފައެވެ.

އައު މަޖިލިސް މެމްބަރުން ހުވާ ކުރެއްވުމަށްފަހު ނޫސްވެރިންނާ ބައްދަލު ކުރެއްވުމުން ނޫސްވެރިޔަކު ވަނީ ފަލާހާ އިޒްރޭލް ޕާސްޕޯޓް މަނާ ކުރުމާ ބެހޭގޮތުން ސުވާލުކޮށްފައެވެ. ޖަވާބުގައި ފަލާހް ވިދާޅުވީ އެއީ ދޭދޭ ދެ ގައުމެއްގެ މައްސަލަ ކަމަށެވެ. ޕިސް ޕިސް.. ކީކޭ ދެން ބުނާނީ، މެމްބަރު ފަލާހަށް ޖަވާބެއް ދޭން ނޭނގުނީ ކަމެއްް ނޫނީ ހަމަ އެކަމުގައި ވިދާޅުވަން ބޭނުންވި ގޮތައް ވިދާޅުވީއެވެ.

އިޒްރޭލް ޕާސްޕޯޓް މަނާ ކުރުމަށް ގޮވާލާ ރާއްޖޭގެ އެކި ކަންކޮޅުތަކުގައި އިހުތިޖާޖްތައް ކުރިޔަށް ގެންދަން ފެށުމުން ސަރުކާރު ހޫނު ފެނަށް ވެއްޓުނެވެ. ވަގުތުން އެކަން ކުރައްވަން އުޅޭކަމަށް ވިދާޅުވިއެވެ. ރައީސް ޑރ މުހައްމަދު މުއިއްޒުގެ ގަރާރަކުން މަނާ ކުރެވެން އޮތް ކަމެއްގައި، ރައްޔިތުންގެ މަޖިލީހަށް އެކަން ފޮނުވީ، މައްސަލަ ދިގު ދަންމާލަން ކަމަށް ގިނަ ފަރާތްތަކުން ކިޔާތީ އަޑުއިވެއެވެ.

އޭގެފަހުން އެމެރިކާ އިން ރާއްޖެއާ ދެކޮޅަށް ފިޔަވަޅު އަޅަން އެ ޤައުމުގެ ޤާނޫނު ހަދާ މަޖިލީހަށް ހުށަހަޅަން ނިންމި އެވެ. އެއާއެކު ރާއްޖެ އަށް އިތުރު ޕްރެޝަރުތަކެއް އަންނާނެ ވާހަކަ ދެކެވެމުން ދިޔައެވެ.

ފަލަސްތީނުގައި އިޒްރޭލުން ހިންގަމުން އަންނަ ގަތުލްއާންމުތަކުގައި އެންމެ ބޮޑަށް ވާގިވެރިވާ އެއް ޤައުމަކީ އެމެރިކާއެވެ. ނަމަވެސް ޕާސްޕޯޓް މަނާ ނުކޮށް އެމެރިކާއަށް ބިރުން ހާރިޖީ ވަޒީރު ޒަމީރު މި ވަޑައިގެންނެވީ އެމެރިކާ ރުއްސާ ސަނާކިޔަންށެވެ. ހައިރާންވެ އަންތަރީސް މީހަކު ނުވާނެހެއްޔެވެ.

ދެން އަނެއްކާވެސް ޕީޖީ ލީޑަރާއި ސަރުކާރުގެ މެމްބަރުންގެ ވާހަކަ ދައްކާލާނަމެވެ. އީދު ބަންދަށްފަހު މަޖިލިސް ފެށިގެން ދެތިން ޖަލްސާއެއް ބާއްވައިފިއެވެ. ކުއްލިއަކަށް "އިގްތިޞާދީ ހާލަތު" ފެނިއްޖެއެވެ. ޖެހިޖެހިގެން ހުރިހާ ޖަލްސާއެއްގައިވެސް އެވާހަކަ އެބަ ދައްކަވައެވެ. މި ސަރުކާރު ވެރިކަމާ ހަވާލުވީ ވެސް ރާއްޖޭގެ އިގްތިޞާދީ ހާލަތު އަނދަވަޅެއްގައި އޮތްކަން އެނގޭއިރު ކުއްލި އަކަށް މިއަދު އަނެއްކާވެސް މި ވާހަކަ ދެއްކުމުގެ ބޭނުމަކީ ކޮބައިތޯ؟

މެމްބަރުން ކުއްލި މައްސަލަތައް ހުށަހަޅަމުން ގެންދަވާއިރު ރާއްޖޭގެ ރައްޔިތުން އެންމެ ކަންބޮޑުވާ އެއްް މައްސަލަ ކަމަށްވާ "އިޒްރޭލް ޕާސްޕޯޓް" މަނާ ކުރުމާ ބެހޭގޮތުން ބަހުސެއް ކުރިޔަށް ނުގެންދަވާ ސަބަބެއް ވެސް ނޭނގެއެވެ. އަނެއްކާ ޕީޖީ ލީޑަރާ އެއްގޮތް ވިސްނުމެއް ގެންގުޅެނީ ނޫންކަމެއްް ވެސް ނޭނގެެވެ. ޕީޖީ ލީޑަރު އޮޑި ބަންނަވަން އުޅުއްވާތީ އަދި ހަމަ ޕާސްޕޯޓް މަނާ ކުރުމުގައި ނުއުޅުވެނީއެވެ. މިއީ މުސްލިމުންގެ ހައްގުގައި ވަކާލާތު ކުރާނެ ކަމަށް ބުނެ އައި ސަރުކާރެވެ. ފެންނަނީ އެ މަންޒަރުތޯ؟