ދައުލަތުގެ ޚަރަދު ދެކޮޅު ނުޖެހިގެން ރައީސުލްޖުމްހޫރިއްޔާ އުޅޭއިރު އެމަނިކުފާނުގެ ރޯލު މޮޑެލް އަބްދުއްރަހީމު އަބްދުﷲ (އަދުރޭ) އެކަމާ ނުވިސްނާކަން ހާމަވެއްޖެއެވެ.

އެގޮތުން ދައުލަތުގެ މާލީ ދަތިކަން ބޮޑުވެ، ހަރަދު ކުޑަކުރަން މަސައްކަތް ފަށާފައި ވާކަމަށް ސަރުކާރުން ހާމަކޮށްފައިވަނިކޮށް، ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ، ބަދަލުވެވަޑައިގަތުމަށް މ. މުރައިދޫގެ މަރާމާތުކުރުމުގެ މަސައްކަތް ފަށާފައިވާކަމަށް މީޑިޔާތަކުގައި ރިޕޯޓުކޮށްފައިވެއެވެ.

އެގޮތުން ޖުލައި މަހުގެ ނިޔަލަށް އެ ގެ މަރާމާތުކޮށް ނިންމާނެ ކަމަށާ އަދި އެ ގެއަށް އަދުރޭ ބަދަލުވާނެ ކަމަށް ވެސް ރިޕޯޓުކޮށްފައިވެއެވެ.

އަދުރޭ މުރައިދޫ ގެއަށް ބަދަލުވާން އުޅޭކަމުގެ އެއްވެސް މައުލޫމާތެއް މަޖިލީހުން އަދި ހާމަކޮށްފައިނުވެއެވެ. މުރައިދޫގޭގެ މަރާމާތަށް ކަރަދު ކުރަނީ ކިހާ ފައިސާއެއްކަން ވެސް އަދި ސާފުވެފައިނުވެއެވެ.

އެމްޑީޕީ ވެރިކަމުގެ ފުރަތަމަ ކޮޅު އެ ގެ ހުސްކޮށް ހުރުމަށް ފަހު، ރައްޔިތުންގެ މަޖިލީހުގެ އޭރުގެ ރައީސް މުހައްމަދު ނަޝީދު ދިރިއުޅުއްވުމަށް އެ ގެ ހާއްސަ ކުރީ، މެއި 6، 2021 ގައި އެ މަނިކުފާނު އަވަހާރަކޮށްލަން ދިން ބޮމުގެ ހަމަލާ ގުޅިގެންނެވެ.

ބޮމުގެ ހަމަލާގައި ލިބިވަޑައިގެންނެވި ޒަހަމްތަކަށް ފަރުވާ ހޯއްދެވުމަށް ފަހު ރާއްޖެވަޑައިގެން މުރައިދޫ ގޭގައި ނަޝީދު ދިރިއުޅުއްވަން ފެއްޓެވީ 2021 ވަނަ އަހަރު ނޮވެންބަރު މަހުން ފެށިގެންނެވެ. އެ މަނިކުފާނު މަޖިލީހުގެ ރައީސްކަމުން ދުރުކުރަން އެމްޑީޕީން ހުށަހެޅި މައްސަލައިގެ ނޯޓިހާ ގުޅިގެން ޖޫން 2023 ގައި މުރައިދޫގެއިން ނުކުމެވަޑައިގެންނެވި އެވެ.

ނަޝީދަށް ފަހު 19 ވަނަ މަޖިލީހުގެ ރައީސްއަކަށް އިންތިހާބު ކުރެއްވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމު މުރައިދޫގޭގައި ދިރިނޫޅުއްވަ އެވެ.