ވަޒީފާގެ މައްސަލަތައް ހައްލު ކުރާނެ ފޯމިއުލާތައް އޮތީ ހަމައެކަނި މި ޓީމުގައި ކަމަށް ރައީސް ޔާމީނުގެ ތާއީދާއެކު މާލެސިޓީގެ މޭޔަރު ކަމަށް ކުރިމަތި ލައްވާ ކުރީގެ ކޮމިޝަނަރ އޮފް ޕޮލިސް ހުސެއިން ވަހީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ ބުދަ ދުވަހުގެ ރޭ ޕީއެންއެފް އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.

އެމަނިކުފާނު ވިދާޅުވީ ރާއްޖެގައި މިހާރު އެންމެ ބޮޑުވެފައިވާ މައްސަލައަކީ ވަޒީފާގެ މައްސަލަ ކަމާށާއި އެކަމަށް ހައްލު ހޯދާދެވޭނެ ފޯމިއުލާ އޮތީ އެމަނިކުފާނާ އެއްކޮށް ވާދަކުރައްވާ 3 ކެޑިޑޭޓުންގެ އަތުގައި ކަމަށެވެ.

އެގޮތުން ކުރީ ސަރުކާރުން އެންމެ ކުދި އަދި މެދު ފަންތީގެ ވިޔަފާރި ތަކަށްވެސް ބިދޭސީން އިތުރު ކުރުމުގެ ސަބަބުން ދިވެހިންނަށް ވަޒީފާގެ ފުރުސަތު ވަރަށް ބޮޑަށް ގެއްލިފައިވާ ކަމަށެވެ. އަދި ހަމައެހެންމެ އެބޭފުޅާ ގެނަސްދޭނީ ދިވެހި ޒުވާނުންނަށް ކުދި އަދި މެދު ފަންތީގެ ވިޔަފާރި ކުރެވޭނެ ގޮތް ތައް ކަމަށް ވެސް ވަނީ ވިދާޅުވެފައެވެ.

މީގެ އިތުރުން ހުސެއިން ވިދާޅުވީ ކޮންމެެހެން ހުރިހާ ވަޒީފާއެއް މާލޭ ސިޓީ ކައުންސިލުން ދޭކަށް ނުޖެހޭނެ ކަމަށާއި ވަޒީފާ ލިބޭނެ ގޮތް މަގު ފަހި ކޮށްދިނުމަކީ ކުރާނެ ކަމެއް ކަމަށް ވަނީ ވިދާޅުވެފައެވެ. އަދި މިއީ ދިވެހި ޒުވާނުންނަށް ވާނެ ވައުދެއް ކަމަށްވެސް ވަނީ ވިދާޅުވެފައެވެ.

މީގެ އިތުރުން އަބަދުވެސް އަޑު އިވެނީ ޒުވާނުންނަށް އަޅާލާނެ ބަޔަކު ނެތިގެން އުޅޭ ވާހަކަ ކަމަށާއި ޒުވާނުން ރިހަބިލިޓޭޓު ކުރުމަށްފަހު އަލުން މުޖުތަމައު އަށް ބޭނުންތެރި ބައެއްގެ ގޮތުގައި ނެރެ ދައްކާނެ ކަމަށް ވެސް ވަނީ ވިދާޅުވެފައެވެ.